پنجاب میں اسکولوں اور کالجوں کی گرمیوں کی تعطیلات 23 مئی سے شروع کی جا سکتی ہیں۔ چند روز قبل حکومت نے عندیہ دیا تھا کہ اگر درجہ حرارت میں مزید اضافہ ہوا تو چھٹیاں مئی کے تیسرے ہفتے کے اختتام پر دی جا سکتی ہیں۔ شدید گرمی کی لہر کے باعث امکان ظاہر کیا جا رہا ہے کہ تعطیلات 23 مئی 2025 سے شروع کی جا سکتی ہیں۔
دریں اثنا محکمہ اسکول ایجوکیشن پنجاب نے چھٹیوں کی مجوزہ تاریخوں کو حتمی شکل دے دی ہے، جس کے مطابق تعطیلات یکم جون سے 9 اگست تک ہوں گی، تاہم ممکنہ شدید گرمی کے پیش نظر اسکول ایک ہفتہ قبل بھی بند کیے جا سکتے ہیں۔
اگرچہ تاریخوں پر اتفاق کر لیا گیا ہے، لیکن اسکولوں کی بندش کا باضابطہ نوٹیفکیشن تاحال جاری نہیں ہوا۔ دوسری جانب محکمہ موسمیات نے آئندہ دنوں میں شدید گرمی کی پیش گوئی کی ہے۔
اس دوران پنجاب یونیورسٹی لاہور نے موسم گرما کی تعطیلات کا نوٹیفکیشن جاری کر دیا ہے، جس کے مطابق تعطیلات 5 جون سے 29 اگست تک جاری رہیں گی، اور اس کا اطلاق لاہور کے علاوہ دیگر شہروں میں موجود یونیورسٹی کے تمام کیمپسز پر بھی ہو گا۔ مزید برآں، تمام ٹیچنگ ڈیپارٹمنٹس کو ہدایت کی گئی ہے کہ سمسٹر 8 کی باقی کلاسز تعطیلات سے قبل مکمل کر لی جائیں۔
