لاہور( نئی تازہ رپورٹ) پنجاب کے دارالحکومت لاہور سمیت ملک کے مختلف شہروں میں بھارت کے تین جاسوس ڈرون تباہ کیے گئے۔ تازہ واقعے میں سندھ کے شہر ڈہرکی میں ایک ڈرون کھیت میں گر کر دھماکے سے پھٹ گیا، جس کے نتیجے میں ایک شخص جاں بحق اور اس کا بیٹا زخمی ہوگیا۔
نجی ٹی وی کے مطابق پولیس حکام نے بتایا کہ لاہور کے علاقے والٹن روڈ پر ایئرپورٹ کے قریب پانچ سے چھ فٹ لمبا ڈرون سرحد پار سے کنٹرول کیا جا رہا تھا، جسے جدید ٹیکنالوجی کے ذریعے سسٹم جام کر کے مار گرایا گیا۔ یہ جاسوس ڈرون مبینہ طور پر حساس مقامات کی نگرانی کے لیے استعمال کیا جا رہا تھا۔
گوجرانوالہ میں ڈرون کا ملبہ برآمد
اسی طرح گوجرانوالہ کے گاؤں پیر جھنڈ میں کھیتوں سے ایک ڈرون کا ملبہ ملا ہے۔ پولیس نے ملبہ قبضے میں لے کر ڈرون کی ساخت اور ماخذ کے بارے میں تفتیش شروع کر دی ہے۔
چکوال میں بھارتی جاسوس ڈرون تباہ، علاقہ سیل
چکوال کے تھانہ ڈوہمن کی حدود میں ایک اور مبینہ بھارتی جاسوس ڈرون کھیتوں میں گر کر تباہ ہو گیا۔ پاک فضائیہ کے ماہرین کی ٹیم موقع پر پہنچ گئی ہے، جہاں ڈرون کی شناخت اور تکنیکی جانچ کی جا رہی ہے، جب کہ قانون نافذ کرنے والے اداروں نے علاقہ مکمل طور پر گھیرے میں لے لیا ہے۔ پولیس کے مطابق، ڈرون گرنے سے کوئی جانی نقصان نہیں ہوا۔
ڈہرکی میں ڈرون گرنے سے جانی نقصان
نہایت افسوسناک واقعہ سندھ کے ضلع گھوٹکی کی تحصیل ڈہرکی میں پیش آیا، جہاں علی الصبح 4 بجے ایک جاسوس ڈرون کھیت میں گر کر زوردار دھماکے سے پھٹ گیا۔ اس واقعے میں دو کسان زخمی ہوئے، جن میں سے مختیار احمد موقع پر ہی دم توڑ گیا، جب کہ اس کا بیٹا عیدن شدید زخمی ہے۔ یہ واقعہ بھارت کی سرحد سے متصل تھانہ کھنجو کی حدود میں واقع علاقے سرفراز لغاری میں پیش آیا۔ ایس ایس پی گھوٹکی ڈاکٹر سمیع اللہ سومرو نے واقعے کی تصدیق کی ہے۔
یاد رہے کہ 6 اور 7 مئی کی درمیانی شب بھارت نے پاکستان کے شہری علاقوں پر حملہ کیا، بھارتی طیاروں اور فوجی چوکیوں کے خلاف پاکستان کی جوابی کارروائی کے بعد دونوں ممالک کے درمیان کشیدگی عروج پرہے۔ جبکہ پاکستان بھر میں سیکیورٹی ادارے ہائی الرٹ ہیں۔
