راولپنڈی میں بارش کے سبب چیمپیئنز ٹرافی کے گروپ ‘بی’ میں آسٹریلیا اور جنوبی افریقہ کے درمیان اہم میچ منسوخ کر دیا گیا۔
میچ کی منسوخی کے نتیجے میں دونوں ٹیموں کو ایک، ایک پوائنٹ دیا گیا، جس کے بعد گروپ ‘بی’ میں جنوبی افریقہ اور آسٹریلیا دو، دو میچ کھیل کر 3، 3 پوائنٹس کے ساتھ بالترتیب پہلی اور دوسری پوزیشن پر ہیں۔
انگلینڈ اور افغانستان نے ایک، ایک میچ کھیل کر تیسری اور چوتھی پوزیشن حاصل کر رکھی ہے، جبکہ گروپ ‘بی’ میں تمام ٹیموں کے پاس سیمی فائنل میں پہنچنے کا موقع باقی ہے۔
دوسری جانب، گروپ ‘اے’ سے بھارت اور نیوزی لینڈ پہلے ہی سیمی فائنل کے لیے کوالیفائی کر چکے ہیں۔
راولپنڈی میں وقفے وقفے سے جاری ہلکی اور تیز بارش کے باعث آسٹریلیا اور جنوبی افریقہ کے درمیان ٹاس بھی ممکن نہ ہو سکا۔
امپائرز نے دوپہر 1:30 بجے شیڈول ٹاس میں تاخیر کا فیصلہ کرنے سے قبل گراؤنڈ کا معائنہ کیا، تاہم شام 5 بجے کے قریب میچ کو باضابطہ طور پر منسوخ کرنے کا اعلان کر دیا گیا۔کیونکہ موسم کی پیش گوئی کے مطابق بارش کا سلسلہ دن بھر جاری رہنے کا امکان ہے۔
واضح رہے کہ ٹورنامنٹ کے اپنے ابتدائی میچوں میں آسٹریلیا نے انگلینڈ جبکہ جنوبی افریقہ نے افغانستان کو شکست دی تھی۔
گروپ ‘اے’ سے بھارت اور نیوزی لینڈ سیمی فائنل میں جگہ بنا چکے ہیں، جبکہ پاکستان اور بنگلہ دیش ٹورنامنٹ سے باہر ہو گئے ہیں۔
