اسلام آباد ( نئی تازہ رپورٹ) نیشنل ڈیٹا بیس اینڈ رجسٹریشن اتھارٹی (نادرا) نے اپنی ویب سائٹ بند کر کے موبائل ایپ متعارف کروانے کا فیصلہ کیا ہے۔ وفاقی وزیرداخلہ محسن نقوی نے اپنے بیان میں کہا کہ نادرا کی پاک آئی ڈی ویب سائٹ 17 جنوری 2025 سے بند کر دی جائے گی اور اب تمام خدمات موبائل ایپ پر فراہم کی جائیں گی۔ انہوں نے بتایا کہ جعلساز عناصر جعلی ویب سائٹس کے ذریعے شہریوں کی شناختی دستاویزات بنانے کی کوشش کر رہے تھے اور ان کی ذاتی معلومات کا غلط استعمال کرتے تھے۔
وزیرداخلہ نے مزید کہا کہ ویب سائٹ کے استعمال میں خاص طور پر بیرون ملک مقیم پاکستانیوں کو مشکلات پیش آتی تھیں، انہیں انگلیوں کے نشانات اور دیگر ضروری دستاویزات اپ لوڈ کرنے میں پریشانی کا سامنا تھا۔ وزارت داخلہ اور وزارت خارجہ نے جعلسازوں کے خلاف سخت اقدامات اٹھانے کا عندیہ دیا ہے۔ نادرا دیگر متعلقہ اداروں کے ساتھ مل کر ان عناصر کے خلاف کارروائی کر رہا ہے۔
محسن نقوی نے کہا کہ نادرا کی موبائل ایپ کو مزید بہتر بنایا گیا ہے اور اب اس پر شناختی کارڈ، نائکوپ، پی او سی، ب فارم، ایف آر سی سمیت تمام خدمات دستیاب ہوں گی۔ شہری اپنے گھر بیٹھے موبائل ایپ کے ذریعے تمام دستاویزات کی کارروائی مکمل کر سکیں گے۔
وزیرداخلہ بتایا کہ نادرا کے تین نئے ریجنل سینٹرز آزاد جموں و کشمیر، گوادر اور گلگت بلتستان میں قائم کیے جائیں گے، جو 31 مارچ سے فعال ہو جائیں گے۔ ان دفاتر کے قیام سے شہریوں کو نادرا کی خدمات تک آسان رسائی ملے گی اور دور دراز علاقوں میں بھی خدمات کی فراہمی میں بہتری آئے گی۔ 19 تحصیلوں میں نادرا دفاتر کا قیام باقی تھا، اس حوالے سے کام تیزی سے جاری ہے اور 31 مارچ تک یہ دفاتر بھی فعال ہو جائیں گے۔
