لاہور( نئی تازہ رپورٹ) الیکشن ٹریبونل نے بانی تحریک انصاف عمران خان کے این اے 122 لاہورسے کاغذات نامزدگی مسترد کرنے کا فیصلہ درست قرار دے دیا ۔
لاہور ہائیکورٹ الیکشن ٹربیونل کے جج جسٹس طارق ندیم نے این اے 122سے عمران خان کے کاغذات مسترد کیے جانے کے فیصلے کے خلاف اپیل پر سماعت کی۔
اس موقع پرالیکشن کمیشن کے وکیل نے پیش ہو کرمؤقف اپنایا کہ عمران خان نااہل ہوچکے ہیں، جبکہ ان کے تجویزہ کنندہ کا تعلق بھی این اے 122 سے نہیں. (ن) لیگ کے وکیل کی طرف سے بھی عمران خان کی اپیل کی مخالفت کی گئی۔
الیکشن ٹربیونل نے سماعت کے بعدآر او کے فیصلے کو درست قرار رکھتے ہوئے عمران خان کے کاغذات مسترد کیے جانے کے خلاف دائر اپیل مسترد کردی۔
اپیلٹ ٹربیونل نے پی ٹی آئی کی رہنما سابق وزیر صحت پنجاب ڈاکٹر یاسمین راشدکی اپیل منظور کرتے ہوئے الیکشن لڑنے کی اجازت دے دی۔
الیکشن ٹربیونل کےجج جسٹس طارق ندیم نے ہی یاسمین راشدکےکاغذات نامزدگی مسترد کیے جانے کے فیصلے کے خلاف اپیل پر سماعت کی۔
ٹربیونل نے یاسمین راشد کے کاغذات مسترد کرنے کا ریٹرننگ افسر کا فیصلہ کالعدم قرار دے دیا اور انہیں این اے 130 سے الیکشن لڑنے کی اجازت دے دی۔
