لاہور( نئی تازہ رپورٹ) دنیا میں کورونا وائرس کے نئے ویرینٹ کے بڑھتے ہوئے کیسز کے پیش نظر حکومت پنجاب نےصوبہ بھر میں کورونا کے ٹیسٹ دوبارہ شروع کرنے کا فیصلہ کیا ہے۔
میڈیا رپورٹ کے مطابق محکمہ صحت پنجاب نے اس سلسلے میں پنجاب کی تمام ضلعی ہیلتھ اتھارٹیز کو مراسلہ ارسال کردیا ہے، مراسلے میں کہا گیا ہے کہ دنیا بھر میں کورونا کیسز میں اضافہ ہورہا ہے، تمام مشتبہ کیسزکی کورونا ٹیسٹنگ شروع کی جائے کیونکہ کورونا ٹیسٹ کے ذریعے ہی صوبے میں کیسز سے متعلق معلوم ہوسکتا ہے۔
ادھر پڑوسی ملک بھارت میں حالیہ دنوں میں کووڈ 19 کے کیسز میں اضافہ دیکھا گیا ہے، گذشتہ روز ملک میں کورونا وائرس سے 6 اموات اور 702 نئےکیسز رپورٹ ہوئے ہیں۔
نئی دہلی سے بھارتی میڈیا کی رپورٹ میں وزیر صحت سوربھ بھردواج کے حوالے سے بتایا گیا کہ نئے کیسز سامنے آنے کے بعد کورونا کے نئے ویرینٹ ’جے این 1‘ سے متعلق بڑھتے ہوئے خدشات کے درمیان ملک میں کورونا کے فعال کیسز کی تعداد 4 ہزار 97 ہوچکی ہے، نئے ویرینٹ کا کیس پہلی بار بدھ کو نئی دہلی میں رپورٹ ہوا تھا۔
عالمی ادارہ صحت کی طرف سے جے این 1 ویرینٹ کو اہم قسم قرار دیا گیا ہے، جو اومیکرون ویرینٹ کا ذیلی سلسلہ ہے، یہ امریکہ میں سب سے زیادہ تیزی سے پھیلنے والے ویرینٹ کے طور پر شناکت کیا گیا ہے، جو وہاں 44 فیصد سے زیادہ کیسز کا باعث ہے۔
ماہرین کے مطابق اگرچہ ’جے این 1‘ کی قسم بہت زیادہ متعدی ہے، تاہم یہ بنیادی طور پر عام نزلہ زکام جیسی ہلکی علامات کا سبب بنتی ہے، جو سانس کی بالائی نالی کو متاثر کرتی ہے۔
