اسلام آباد( نئی تازہ رپورٹ) پی ٹی آئی کے رہنما اسد عمر نے پارٹی کی بنیادی رکنیت سے مستعفی ہونے اور سیاست سے مکمل طور پر علیحدگی کا اعلان کر دیا۔
سماجی رابطے کی ویب سائٹ پر جاری بیان میں پاکستان تحریک انصاف کے رہنما اسد عمر نے کہا کہ ایک دہائی سے زیادہ عوامی زندگی کے بعد میں نے سیاست کو مکمل طور پر چھوڑنے کا فیصلہ کیا ہے۔
انہوں نے کہا کہ جیسا کہ میں پہلے بھی عوامی سطح پر کہہ چکا ہوں کہ ریاستی اداروں کے ساتھ تصادم کی پالیسی سے متفق نہیں ہوں، ایسی پالیسی ریاستی اداروں کے ساتھ شدید ٹکراؤ کا باعث بنی ، جو ملک کے مفاد میں نہیں ہے۔
اسد عمر نے کہا کہ پی ٹی آئی کی بنیادی رکنیت سے استعفیٰ دے رہا ہوں۔ میں ان تمام لوگوں کا شکرگزار ہوں جنہوں نے عوامی زندگی میں میرا ساتھ دیا۔انہوں نے خاص طور پر این اے 54 کی ٹیم اور ووٹرز کا شکریہ ادا کیا ۔
