اسلام آباد ( نئی تازہ رپورٹ) سابق وفاقی وزیر داخلہ اور مسلم لیگ ن کے رہنما رانا ثنا اللہ نے کہا ہے کہ چیئرمین تحریک انصاف کو پاکستان کی عالمی بدنامی کیلئے استعمال کیا جا رہا ہے۔
پاکستان مسلم لیگ (ن) پنجاب کے صدر رانا ثناء اللہ اپنے ایک بیان میں کہا کہ عدالتی نظام کے لاڈلے کو باہر جانے کی کیا ضرورت ہے؟ ابہوں نے کہا کہ عالمی عدالت انصاف جانے کا مطلب پاکستان کو عالمی کٹہرے میں مجرم بنا کر کھڑا کرنا ہے، ایسے مکروہ کام صرف ملک دشمن اور ان کے کارندے کرتے ہیں۔
رانا ثناء اللہ نے کہا کہ دہشت گردوں کو پاکستان واپس لانے، رہا کرانے اور آباد کرانے والے اب دہشت گردوں کو نیا راستہ دکھا رہے ہیں اور جن کا بندہ ہے وہ اسے بچانے کی کوشش کر رہے ہیں۔
سابق وزیر داخلہ نے کہ چیئرمین پی ٹی آئی نے اپنے دور اقتدار میں مہنگائی سے خانہ جنگی کی راہ ہموار کی، نوجوانوں کے ذہن میں بارود بھردیا تاکہ وہ حملہ آور جتھوں میں بدل جائیں۔
انہوں نے کہا کہ پاکستان کو عالمی عدالت انصاف میں کھڑا کرنے سے فلسطین اور مقبوضہ جموں و کشمیر کے انسانوں کے حقوق غصب کرنے والوں کو دلی خوشی ہوئی، کٹھ پتلی کو پاکستان کی عالمی بدنامی کیلئے استعمال کیا جا رہا ہے، انہوں نے سوال کیا کہ چیئرمین پی ٹی آئی پر یہ پیسہ کون خرچ کر رہا ہے؟
