لندن ( نئی تازہ رپورٹ) انٹرنیشنل بلائنڈ اسپورٹس فیڈریشن کے زیر اہتمام برطانیہ میں منعقدہ ابسا ورلڈ گیمز 2023 کے فائنل میچ میں پاکستان بلائنڈ کرکٹ ٹیم نے بھارت کو شکست دے کر گولڈ میڈل جیت لیا ۔
پاکستان بلائنڈ کرکٹ ٹیم کو بلائنڈ عالمی کپ کے مسلسل پانچ فائنل کھیلنے کا اعزاز حاصل ہے، رواں سال قومی ٹیم تیسری مرتبہ عالمی چمپیئن بنی۔
پاکستان نے گزشتہ روز برطانیہ میں بلائنڈ کرکٹ ورلڈ کپ کے فائنل ٹی ٹوئنٹی میچ میں عمدہ باؤلنگ کرتے ہوئے بھارتی ٹیم کو 20 اوورز میں 3 وکٹوں کے نقصان پر 184 رنز تک محدود رکھا ، بھارت کی جانب سے ٹومپکی نے 76 اور رمیش نے 48 رنز بنائے۔
پاکستان نے 15ویں ہی اوور میں 2 وکٹوں کے نقصان پر ہدف حاصل کر لیا۔ اوپننگ بلے باز مطیع اللہ اور نصار علی نے صرف 27 گیندوں پر 50 رنز بنائے۔
محمد سلمان نے 25 گیندوں پر 48 اور بدر منیر نے 12 گیندوں پر 41 رنز بنائے ، نثار علی نے ٹیم کے سکور میں36 رنز کا حصہ ڈالا ۔
پاکستانی ٹیم بلائنڈ کرکٹ ورلڈ گیمز میں ناقابل شکست رہی، قومی ٹیم نے ایونٹ میں بھارت، بنگلہ دیش، آسٹریلیا اور انگلینڈ کو شکست دی۔
پاکستانٹیم نے ٹورنامنٹ کا شاندارانداز میں آغاز کیا اور ایونٹ کے اپنے پہلے میچ میں بھارت کو 18 رنز سے شکست دی۔
ابسا ورلڈ گیمز (ورلڈ بلائنڈ گیمز) ایک بین الاقوامی ایونٹ ہے، جو ہر 4 سال بعد منعقد ہوتا ہے، جس کا اہتمام بین الاقوامی بلائنڈ اسپورٹس فیڈریشن کرتا ہے، اس ایونٹ میں نابینا اور جزوی نابینا کھلاڑیوں کو کئی کھیلوں میں حصہ لینے کے قابل بنایا جاتا ہے، اس فیڈریشن کے تحت پہلا میچ اسپین میں 1998 میں کھیلا گیا تھا۔
