کراچی ( نئی تازہ مانیٹرنگ) وفاقی تحقیقاتی ادارے ایف آئی اے نے اہم کارروائی کر تے ہوئے اسرائیل میں ملازمت کرنے والے 5 پاکستانیوں کو گرفتار کر لیا۔
میڈیا رپورٹ کے مطابق ایف آئی اے کرائم سرکل میرپور خاص نے اہم کارروائی کے دوران اسرائیل میں ملازمت اختیار کرنے والے 5 پاکستانیوں کو گرفتار کر لیا ، مجموعی طور پر 8 ملزمان کے خلاف 5 مقدمات کا اندراج کیا گیا، ملزمان تل ابیب میں ہیلپر اور کار واشر کے طور پرملازمت کرتے رہے۔
ایف آئی اے ذرائع کے مطابق ملزمان 4 سے 7 سال تک تل ابیب میں مقیم رہے، ملزمان نے اسرائیلی ایجنٹ کے ذریعے انٹری حاصل کی اورایجنٹ کو فی کس 3 سے 4 لاکھ روپے ادا کیے، گرفتار ملزمان نعمان صدیقی، کامل انور، کامران صدیقی، محمد ذیشان اور محمد انور کا تعلق میرپور خاص سے ہے جو شینگن ویزے پراردن ایئرپورٹ سے اسرائیل میں داخل ہوتے تھے۔
معلوم ہوا ہے کہ ملزمان ویسٹرن یونین کے ذریعے پاکستان رقوم منتقل کرتے رہے اور ترکیہ، کینیا و سری لنکا کے راستے سے بھی اردن ایئرپورٹ سے اسرائیل داخل ہوتے رہے۔
ملزمان وطن واپسی کے لیے دبئی کے راستےاردن ایئرپورٹ سے کراچی آتے تھے، ملزمان کے خلاف پاسپورٹ ایکٹ اور امیگریشن آرڈیننس کے تحت مقدمات درج کر لیے گئے، ایف آئی اے دیگر ملزمان کی گرفتاری کے لیے چھاپے مار رہی ہے۔
