لندن ( نئی تازہ رپورٹ) وزیراعظم شہباز شریف نے لندن میں پاکستان مسلم لیگ ن کے قائد نوازشریف سے ملاقات کی۔
ڈھائی گھنٹے طویل ملاقات کے دوران ملک کی سیاسی صورتحال پر تبادلہ خیال کیا گیا، دونوں رہنمائوں نے اسمبلی تحلیل ، نگران سیٹ اپ کے قیام اور دیگر امور پر بھی غور کیا۔
لندن میں میڈیا سے گفتگو کرتے ہوئے وزیراعظم نے کہا کہ آئی ایم ایف کے ایم ڈی سے ملاقات خوشگوار رہی، منیجنگ ڈائریکٹر کو بتا دیا پاکستان نے تمام شرائط پوری کر دی ہیں، اب بورڈ لیول معاہدہ ہو جانا چاہیے، تمام معاملات خوش اسلوبی سے طے کرنا چاہتے ہیں۔
وزیراعظم نے کہا کہ اب پاکستان کا پروگرام آئی ایم ایف کے بورڈ میں جا کر منظور ہونا چاہیے، پاکستانی ٹیم کی قیادت اسحاق ڈار کریں گے ، میرا بھی ان سے رابطہ ہے ۔
شہباز شریف نے کہا کہ میاں نواز شریف کا علاج ہو رہا ہے اور الحمد اللہ وہ ٹھیک ہیں۔
انہوں نے بتایا کہ نواز شریف کا اتوارکی صبح لندن سے دبئی پہنچنے کا امکان ہے، وہ تین سے چار دن وہاں قیام کریں گے جبکہ بعد ازاں حج کی ادائیگی کیلئے دبئی سے سعودی عرب بھی جائیں گے۔
وزیراعظم شہباز شریف نے بتایا کہ مسلم لیگ ن کی رہنما مریم نواز بھی آج لاہور سے روانہ ہوں گی، وہ والد کے ساتھ حج کریں گی۔
وزیر اعظم نے کہا کہ ماحولیات کے حوالے سے کانفرنس میں منیجنگ ڈائریکٹر عالمی مالیاتی فنڈ (آئی ایم ایف) سے ملاقات خوش گوار رہی، انہیں بتایا ہے کہ پاکستان نے تمام شرائط پوری کردی ہیں۔
وزیراعظم شہباز شریف کی قبل ازیں لندن میں اسلامی ترقیاتی بینک کے صدر محمد الجاسر سے بھی ملاقات ہوئی۔
وزیراعظم نے سیلاب سے ہونے والے نقصانات کی بحالی میں معاونت کیلئے اسلامی ترقیاتی بینک کی جانب سے 4.2 ارب ڈالر فراہمی کے اعلان کو سراہا اور ماحولیات دوست پاکستان کانفرنس میں شرکت پر ڈاکٹر الجاسر کا شکریہ ادا کیا ۔
وزیراعظم نے اسلامی ترقیاتی بینک کے صدر محمد الجاسر کو پاکستان کے دورے کی دعوت بھی دی۔
اس سے قبل وزیراعظم شہباز شریف فرانس کے دارالحکومت پیرس سے برطانیہ پہنچے ، انہوں نے فرانس کا دو روزہ دورہ کیا اور نئے عالمی مالیاتی معاہدے کے سربراہی اجلاس میں شرکت کی ، وزیر اعظم کی کئی عالمی رہنماؤں سے ملاقاتیں بھی ہوئیں۔
