لاہور ( نئی تازہ مانیٹرنگ) محکمہ موسمیات نے 24 جون سے پنجاب سمیت ملک کے بالائی علاقوں میں گرج چمک کے ساتھ بارش کی پیش گوئی کر دی۔
دوسری جانب پی ڈی ایم اے نے کہا ہے کہ 25 جون سے مغربی ہواؤں کا سلسلہ ملک کے بالائی علاقوں میں داخل ہونے کا امکان ہے۔
رپورٹس میں بتایا گیا ہے کہ 24 سے 30 جون کے دوران لاہور، اسلام آباد، راولپنڈی، مری، گلیات، جہلم،اٹک، چکوال، سرگودھا،میانوالی، حافظ آباد، منڈی بہاؤالدین، گوجرانوالہ، گجرات،قصور، سیالکوٹ، نارووال ،شیخوپورہ، فیصل آباد اور جھنگ میں تیز ہوائیں چلنے اور گرج چمک کے ساتھ بارش جبکہ بعض مقامات موسلادھار بارش کا بھی امکان ہے۔
اسی طرح 24 سے 29 جون کے دوران ملتان، بھکر، لیہ، کوٹ ادو، ڈی جی خان، راجن پور، بہاولپور، بہاولنگر، ساہیوال، پاکپتن اور اوکاڑہ میں آندھی آنے اور گرج چمک کے ساتھ بارش جبکہ بعض مقامات پر تیز بارش کا امکان ہے۔
پی ڈی ایم اے نے اپنے ا لرٹ میں کہا ہے کہ موسلا دھار بارش کے باعث 26 اور 27 جون کو لاہور، اسلام آباد، راولپنڈی اور گوجرانوالہ کے نشیبی علاقوں میں اربن فلڈنگ جبکہ مری میں لینڈ سلائیڈنگ کا خدشہ ہے۔
پی ڈی ایم اے نے کہا ہے موسلا دھار بارشوں سے 27 جون کو ڈی جی خان میں سیلابی صورت حال کا خطرہ ہے۔ مسافر اور سیاح خراب موسم میں ناخوشگوار صورتحال سے بچنے کے لیے احتیاطی تدابیر اختیارکریں۔
شہریوں کو ہنگامی صورتحال میں مدد کے لیے پی ڈی ایم اے کی ہیلپ لائن 1129 پر کال کرنے کی ہدایت کی گئی ہے۔
