عمران امریکا کے پاؤں پکڑ رہے ہیں، کارکن خلاف نعرے لگا رہے ہیں،شیری رحمان

اسلام آباد ( نئی تازہ رپورٹ) وفاقی وزیر ماحولیاتی تبدیلی سینیٹر شیری رحمان نے کہا ہے کہ عمران خان امریکا کے پاؤں پکڑ رہے ہیں ان کے کارکن امریکی غلامی کے خلاف نعرے لگا رہے ہیں۔انتخابات پاکستان کا اندرونی معاملہ ہے، امریکا سے مداخلت کا مطالبہ قابل مذمت ہے۔

ٹوئٹر پر ایک بیان میں شیری رحمان نے کہا کہ گزشتہ سال اپریل میں عمران خان نام نہاد ’بیرونی سازش‘ کا بیانیہ بنا کر سیاست کر رہے تھے، اب یوٹرن لے کر امریکی قانون سازوں کی منت سماجت کر رہے ہیں۔

انہوں نے ایک انگریزی اخبار کی خبر کا حوالہ دیتے ہوئے کہا کہ عمران خان نے ایک ماہ کے اندر 4 امریکی ارکان کانگریس سے حمایت کی درخواست کی، انہوں نے موجودہ امریکی انتظامیہ پر الزامات لگا کر ملکی سفارتی تعلقات اور مفادات کو داؤ پر لگایا، امریکی غلامی اور امریکی سازش کے نعرے لگائے، لوگوں کو امریکا کے خلاف ورغلایا۔

شیری رحمان نے کہا کہ عمران خان اب اپنے تعلقات ٹھیک کرنے اور حکومت میں آنے کیلئے اسی امریکی انتظامیہ کی حمایت مانگ رہے ہیں، لابنگ فرمز کی خدمات حاصل کر کے بائیڈن انتظامیہ کو قائل کر رہے ہیں کہ عمران خان اور تحریک انصاف امریکا مخالف نہیں۔

وفاقی وزیر نے کہاکہ انتخابات پاکستان کا اندرونی معاملہ ہے، امریکا سے مداخلت کا مطالبہ کرنا قابل مذمت ہے۔