چیئرمین نیب آفتاب سلطان نے عہدے سے استعفیٰ دے دیا

اسلام آباد ( نئی تازہ رپورٹ)چیئرمین قومی احتساب بیورو (نیب) آفتاب سلطان نے استعفیٰ دے دیا۔ وزیراعظم شہبازشریف نے استعفیٰ منظور کرلیا ہے۔ذرائع کے مطابق چیئرمین نیب آفتاب سلطان نے وزیراعظم سے ملاقات کی اورکہا کہ وہ اس ماحول میں کام نہیں کر سکتے۔ وزیراعظم شہبازشریف نے چیئرمین نیب آفتاب سلطان کا استعفیٰ منظور کرلیا ہے،ذرائع کے مطابق آفتاب سلطان نے کسی کی خواہش پر کام کرنے سے انکار کردیا تھا، وہ نہیں چاہتے تھےکہ وہ سابق چیئرمین نیب جاوید اقبال کی طرح کا کردار ادا کریں۔ذرائع نے بتایا کہ آفتاب سلطان پر کچھ گرفتاریوں کے لیے دباؤ تھا تاہم انہوں نے اس سے انکار کر دیا۔

نجی ٹی وی سےگفتگو کرتے ہوئےآفتاب سلطان نے کہا کہ میں نے کچھ دن پہلے استعفیٰ دیا تھا، مجھے کچھ چیزوں کے بارے میں کہا گیا جو مجھے قبول نہیں تھیں۔آفتاب سلطان کے مطابق میں نے بتایا کہ میں شرائط کےساتھ کام جاری نہیں رکھ سکتا، میرا استعفیٰ قبول کرلیا گیا ہے، انہوں نے کہا اختتام اچھے موڑ پر ہوا ہے، وزیراعظم شہباز شریف نے میرے لیے نیک خواہشات کا اظہارکیا، میری بھی ان کے لیے نیک خواہشات ہیں۔ آفتاب سلطان سابق چیئرمین نیب جاوید اقبال کی ریٹائرمنٹ کے بعد جولائی 2022 میں نیب کے سربراہ بنے تھے۔