اسلام آباد( نئی تازہ رپورٹ) نیپرا نے سہہ ماہی ایڈجسٹمنٹ کی مد میں بجلی کی قیمت میں 5 روپے 40 پیسے فی یونٹ اضافے کی منظوری دے دی۔
حکومتی تقسیم کار کمپنیوں کی جانب سے چوتھی سہ ماہی ایڈجسٹمنٹ کی مد میں قیمتوں میں اضافے کے لیے دائر درخواست پر نیشنل الیکٹرک پاور ریگولیٹری اتھارٹی (نیپرا) کے ممبر رفیق شیخ نے سماعت کی۔
مالی سال 23-2022 کی چوتھی سہ ماہی ایڈجسٹمنٹ پر سماعت کے بعد نیپرا نے بجلی 5 روپے 40 پیسے فی یونٹ مہنگی کرنےکی منظوری دے دی۔
بجلی کی قیمتوں میں اضافہ سال 2022-23 کی چوتھی سہ ماہی ایڈجسٹمنٹ کی مد میں ہو گا جس کا اطلاق لائف لائن اورکے الیکٹرک صارفین پر نہیں ہوگا۔بتایا گیا ہے کہ نیپرا سہ ماہی ایڈجسٹمنٹ پر تفصیلی فیصلہ بعد میں جاری کرے گا۔
دوران سماعت ممبر نیپرا رفیق شیخ کا کہنا تھا کہ دعا کریں اللہ بہتر کرے، صارفین کی طرح ہم بھی بل ادا کرتے ہیں۔
بجلی کی تقسیم کارکمپنیوں کی جانب سے قیمتوں میں اضافے کے حوالے سے نیپرا میں دائر درخواست کے متن کے مطابق فیسکو نے 23 ارب 49 کروڑ، گیپکو نے 16 ارب 13 کروڑ کا اضافہ کی اجازت طلب کی ، جب کہ حیسکو اور آئیسکو نے9، 9 ارب روپے اضافے کی درخواست دی ہے۔
علاوہ ازیں لیسکو نے صارفین پر 31 ارب، میپکو نے 27 ارب، پیسکو 9 ارب جب کہ کیسکونے 7 ارب، سیپکو 5 ارب روپے اور ٹیسکو نے 4 ارب روپے کا بوجھ ڈالنے کے لئے درخواست دی ہے۔
