اسلام آباد( نئی تازہ رپورٹ) سینیئر وکیل خواجہ حارث نے توشہ خانہ کیس میں چیئرمین پی ٹی آئی عمران خان کی قانونی ٹیم سے علیحدگی اختیار کر لی۔ کیس کی تمام فائلیں واپس بھجوا دیں۔
ذرائع کے مطابق خواجہ حارث کو چیئرمین پی ٹی آئی کی قانونی ٹیم میں ڈسپلن کے حوالے سے تحفظات تھے جس پر انہوں نے نے علیحدگی کا فیصلہ کیا، معلوم ہوا ہے کہ سپریم کورٹ اور ہائیکورٹ میں چیئرمین پی ٹی آئی کی نمائندگی لطیف کھوسہ اور قانونی ٹیم کے دیگر ارکان کریں گے۔
خواجہ حارث نے کیس کی تمام فائلیں چیئرمین پی ٹی آئی کی لیگل ٹیم کو بھجوا دی ہیں۔
اسلام آباد ہائیکورٹ میں سزا معطلی کی درخواست پر سماعت کے لیے خواجہ حارث پیش نہیں ہوں گے، وہ 22 اگست کی سماعت میں بھی پیش نہیں ہوئے تھے۔
توشہ خانہ کیس سے متعلق سپریم کورٹ میں زیر سماعت درخواست میں بھی چیئرمین پی ٹی آئی کی وکالت خواجہ حارث نہیں کریں گے۔
نجی ٹی وی کے مطابق خواجہ حارث نے اسلام آباد ہائی کورٹ کے چیف جسٹس عامر فاروق پر اعتراض نہ اٹھانے کا مشورہ دیا تھا لیکن لیگل ٹیم کے کچھ ارکان نے چیف جسٹس کی سربراہی میں بینچ پر اعتراض اٹھانے کا مشورہ دیا۔
