کوئٹہ ( نئی تازہ مانیٹرنگ) بلوچستان کے شہر چمن میں سنگین مقدمات میں ملوث 15 سے 20 قیدی جیل توڑ کر فرار ہو گئے۔
پولیس سب جیل میں قید قتل، اقدام قتل سمیت دیگر سنگین جرائم میں ملوث قیدیوں نے جیل کےاندر سے پولیس پر حملہ کیا۔ پولیس کے مطابق صبح سویرے بیرکس سے قیدیوں کو نماز کیلئے باہر نکالا تو انہوں نے حملہ کر دیا۔
جیل حکام کے مطابق قیدیوں نے مین گیٹ کے باہر کھڑے اہلکار سے کلاشنکوف چھین کر فائرنگ کر دی، جس ایک جیل اہلکار بھی زخمی ہو گیا۔
بتایا گیا ہے کہ بیرک نمبر4 میں 302 اور سنگین جرائم میں ملوث ملزمان قید تھے۔ بیرک نمبر1، 2 اور 3 سے قیدی نماز پڑھنے کے لیے مسجد چلے گئے۔ اس کے بعد بیرک نمبر4 میں خطرناک جرائم میں ملوث قیدیوں کو نماز پڑھنے نکالا تو سب نے ایک ساتھ حملہ کر دیا۔
بیرک انچارج کے مطابق تقریبا 15 سے زائد خطرناک قیدی معذور قیدیوں کی بیساکھیوں سے اس پر حملہ آور ہوئے۔ قیدی باہر نکل کر جیل کے احاطے میں آگئے اور مین گیٹ پر کھڑے سنتری سے سرکاری کلاشنکوف چھین کرپولیس اہلکاروں پر فائرنگ کی۔
قیدیوں نے مین گیٹ پر فائرنگ کرکے تالہ توڑدیا اور گیٹ کھول کر فرار ہوگئے۔ یہ پولیس سب جیل تاج روڈ پر واقع ہے ، سٹی پولیس اسٹیشن بھی قریب ہے،
ایس پی نعیم اچکزئی نے میڈیا بتایا کہ واقعے کےفوری بعد پولیس نے کارروائی کی اور کوئیک رسپانس فورس نے سرچ آپریشن کیا۔
بعد ازاں ہڈی پکٹ اور گورئی کہول کے علاقے میں پولیس اور ملزمان کے مابین مقابلہ بھی ہوا۔ پولیس کی جوابی کارروائی میں ایک قیدی ہلاک اور دو زخمی ہوگئے جنہیں ہسپتال منتقل کردیا گیا ہے۔
ایس پی کے مطابق مفرور قیدیوں کے باہر سے سہولت کار ہو سکتے ہیں۔ انہوں نے کہا کہ عید کے موقع پر بعض پولیس اہلکاروں کی ڈیوٹیاں عیدگاہوں پر لگائی گئی تھیں جس کی وجہ سے جیل میں پولیس اہلکاروں کی تعداد کم تھی۔ فرار قیدیوں کی دوبارہ گرفتار ی کیلئے کوئیک رسپانس آپریشن کیا جا رہا ہے۔
