واشنگٹن( نئی تازہ رپورٹ) مائیکروسافٹ کے بانی بل گیٹس نے پیش گوئی کی ہے کہ 12 سال بعد کوئی ملک غریب نہیں رہے گا اور اکثر ممالک کی آمدنی آج کے چین اور بھارت سے زیادہ ہوگی۔
میڈیا رپورٹ کے مطابق ورلڈ اکنامک فورم کے سالانہ اجلاس میں بل گیٹس کا خط پڑھا گیا جس میں انھوں نے کہا کہ امیر ممالک کے اہم منصوبوں اور ایجادات کو استعمال میں لانے کی وجہ سے 2035 تک دنیا میں کوئی ملک غریب نہیں رہے گا۔
بل گیٹس نے کہا کہ کم یا درمیانی آمدنی والے ممالک امیر پڑوسی ممالک سے سیکھیں گے جن میں میڈیکل کے شعبے میں نئی ویکسین، زراعت میں بہتر بیج سے زیادہ پیداوار اور ڈیجیٹل انقلاب شامل ہیں۔
مائیکرو سافٹ کے بانی کے مطابق کم آمدنی والے ممالک دیگر شعبوں میں بھی جدید تبدیلیوں سے فائدہ اٹھاکر نئی سرمایہ کاری کو اپنی جانب راغب کرنے میں کامیاب ہوں گے۔
بل گیٹس کے مطابق دنیا اس وقت پہلے سے بہتر حالت میں ہے۔ انہوں نے کہا کہ میں کافی پُر امید ہوں اور پیش گوئی کرسکتا ہوں کہ 2035 تک دنیا میں کوئی ملک غریب ملک نہیں رہے گا۔
بل گیٹس نے کہا کہ 2035 تک 70 فیصد سے زائد ممالک کی فی کس آمدنی آج کے چین سے زیادہ ہو جائے گی جبکہ 90 فیصد ممالک کی آمدنی بھارت کی موجودہ آمدنی سے بڑھ جائےگی۔
