کراچی ( نئی تازہ رپورٹ) صوبہ سندھ میں ایچ آئی وی HIV وائرس بچوں میں تیزی سے پھیلنے لگا، وائرس سے 324 بچے جاں بحق ہو نے کا انکشاف ہوا ہے، متاثرہ بچوں کی تعداد 2865 ہو گئی۔
صوبائی وزارت صحت کے مطابق گزشتہ ایک سال کے دوران ایچ آئی وی سے متاثرہ 164 جبکہ گزشتہ 4 سال میں 324 بچے جاں بحق ہوگئے۔
محکمہ صحت سندھ کے مطابق گزشتہ 4 سال میں ایچ آئی وی سے جاں بحق ہونے والے بچوں میں 207 لڑکے اور 117 لڑکیاں شامل ہیں۔
محکمہ صحت کے اعداد و شمار میں انکشاف ہوا ہے کہ صوبہ بھر میں ایچ آئی وی سے متاثرہ بچوں کی تعداد 2865 ہو چکی ہے جن میں سے گزشتہ 2 ماہ کے دوران 17 مز ید بچے ایچ آئی وی سے متاثر ہوئے ہیں۔
اس حوالے سے بچوں کے مراض کی ماہرسینئر ڈاکٹر فاطمہ میر نے کہا ہے کہ سندھ میں ایچ آئی وی سے متاثرہ بچوں کی موت کی بڑی وجہ ٹی بی تھی، ایسے بچوں میں خون کی کمی اور ویکسی نیشن نہ ہونا ایک وجہ ہے جبکہ ان بچوں میں ہیپاٹائٹس بی اور سی بھی عام ہے۔
