اسلام آباد ( نئی تازہ رپورٹ) حکومت نے آئی ایم ایف کی شرط پر لگژری آئٹمز پر 25 فیصد سیلز ٹیکس عائد کرنے کا نوٹیفکیشن جاری کر دیا۔ امپورٹڈ شوز، خواتین کے پرس، شیمپو، صابن،امپورٹڈ اور مقامی تیار ہونے والی 1400 سی سی گاڑیوں پر بھی اضافی سیلز ٹیکس ادا کرنا ہوگا۔
لگژری آئٹمز پر سیلز ٹیکس بڑھانے سے ایف بی آر کو چار ماہ کے دوران 15 ارب روپے کی آمدن کی توقع ہے۔
ایف بی آر کے نوٹیفکیشن کے مطابق امپورٹڈ الیکٹرونکس آئٹمز، خواتین کے لیے امپورٹڈ میک اپ کے سامان پر سیلز ٹیکس 25 فیصد ہو گیا، امپورٹڈ لپ اسٹک، فیس پاؤڈر، بالوں کے لیے رولر اور ڈرائرز پر بھی سیلز ٹیکس کی شرح 25 فیصد کر دی گئی ہے۔ امپورٹڈ برانڈڈ شوز، خواتین کے لیے امپورٹڈ برانڈ کے پرس، امپورٹڈ شیمپو، صابن اور لوشن پر بھی سیلز ٹیکس 25 فیصد ہوگا۔ نوٹیفکیشن کے مطابق پالتو جانوروں کی امپورٹڈ خوراک،امپورٹڈ برانڈ ہیڈ فونز، آئی پوڈ اور اسپیکرز، امپورٹڈ دروازوں اور کھڑکیوں پر سیلز ٹیکس 25 فیصد ہوگیا، امپورٹڈ لگژری برتن، امپورٹڈ باتھ فٹنگز پر بھی سیلز ٹیکس کی شرح 25 فیصد ہوگی۔
ایف بی آر کے نوٹیفکیشن میں کہا گیا ہے کہ امپورٹڈ ٹائلز، سینٹری سامان، امپورٹڈ فانونس اور فینسی لائٹس پر بھی سیلزٹیکس 25 فیصد کردیا گیا، امپورٹڈ اور مقامی تیار ہونے والی 1400 سی سی گاڑیوں پر بھی سیلز ٹیکس 25 فیصد کر دیا گیا ہے۔ دو روز قبل حکومت نے عالمی مالیاتی ادارے کی ایک اور شرط پوری کی تھی اور کابینہ کی طرف سے لگژری آئٹمز پر سیلز ٹیکس 25 فیصد کرنے کی منظوری دی گئی تھی۔
