کراچی ( نئی تازہ رپورٹ) پولیس نے ملیر کے علاقے بن قاسم میں 6 سالہ بچی کو اغوا کرکے زیادتی کے بعد قتل کرنے والے پڑوسی ملزم کو گرفتار کرلیا۔
ایس ایس پی ملیر حسن سردار نے مقتولہ بچی کے والد کے ہمراہ میڈ یا سے گفتگو میں بتایا کہ گرفتار ملزم انتظار حسین مقتولہ بچی کا پڑوسی اور پیشے کے لحاظ سے رنگ ساز ہے،مرکزی ملزم انتظار پنجاب کے شہر لیہ کا رہائشی ایکرنگ ساز ہے جو پینٹ وغیرہ کے کام کی وجہ سے کراچی میں رہائش پذیر ہے۔ ملزم نے بچی کو بہلا پھسلا کر اغوا کیا اور زیادتی کا نشانہ بنایا۔ ایس ایس پی نے بتایا کہ واردات کے بعد ملزم کے ساتھی اللہ رکھا نے لاش ٹھکانے لگانے میں انتظار کی مدد کی۔ انہوں نے کہا کہ ہم نے بچی کے والد اور لواحقین سے وعدہ کیا تھا کہ اس انسانیت سوز درندگی کے بھیانک واقعہ میں 24 گھنٹوں میں پیش رفت ہوگی اور ملیر پولیس نے بچی کے جنازے سے پہلے درندے اور اس کے ساتھی کو گرفتار کر لیا ہے جو بچی کے محلے میں رہتا ہے۔
واضح رہے کہ بن قاسم ٹاؤن پولیس نے متاثرہ بچی کے والد کی شکایت پر تعزیرات پاکستان کی دفعہ 363 اور 34 کے تحت ایف آئی آر درج کی تھی۔ایف آئی آر کے مطابق شکایت گزار نے کہا کہ وہ پیشے کے اعتبار سے ٹیکسی ڈرائیور ہے جو اپنے خاندان کے ساتھ بن قاسم کے داتا نگر میں گزشتہ 8 سے 9 برس سے رہائش پذیر ہے۔والد کے مطابق وہ 27 فروری کو صبح 7 بجے گھر سے روزی روٹی کمانے کے لیے ٹیکسی میں نکلا اور اس کی بیوی نے اسے بیٹی کی گمشدگی کی اطلاع فون پر دی ۔چی اسی محلے میں دکان سے کھانے کی اشیا خریدنے کے لیے صبح 8 بجے گھر سے نکلی تھی۔
ایف آئی آر میں بتایا گیا کہ جب شکایت گزار گھر پہنچا تو پڑوسیوں اور دکاندار سے بھی ملاقات کی جس نے اسے بتایا کہ لڑکی دکان پر آئی تھی اور کچھ کھانے کی چیزیں خرید کر وہاں سے چلی گئی ہیں۔والد نے محلے سے اپنی بیٹی کی تلاش جاری رکھی لیکن اس کا کوئی سراغ نہ مل سکا۔