فیصل آباد ( نئی تازہ رپورٹ) وفاقی وزیرداخلہ رانا ثنا اللہ نے کہا ہے کہ جیل بھرو تحریک عمران خان کے لئے ڈوب مرو تحریک بن گئی ہے۔ کل ملاکر 100، سوا سو آدمی اکٹھے ہوئے ، 80 فیصد کہتے ہیں ہمیں چھوڑ دیں۔اتوار کوفیصل آباد میں میڈیا سے بات کرتے ہوئے رانا ثنا اللہ نے کہا کہ عمران خان کبھی اسلام آباد پر حملہ آور ہوتا ہے تو کبھی اسلام آباد سیل کرنے کی دھمکی دیتا ہے، ناکامیوں کے بعد اسمبلیاں توڑنے کا حربہ استعمال کیا۔
وزیر داخلہ نے کہا کہ عمران خان نے آٹھ ماہ سے ملک میں فتنہ اور فساد برپا کر رکھا ہے، ان کابیانیہ صرف اور صرف کنفیوژن پھیلانے کے لئے ہے، عمران خان نے پونے چار سال مسائل پیدا کرنے کی کوشش کی اور اب مسائل بڑھانے کی کوشش کررہا ہے،ہم ملک کومسائل سے نکالنے کی کوششوں میں لگے ہیں۔وزیر داخلہ نے کہا کہ جیل بھرو تحریک عمران خان کے لئے ڈوب مرو تحریک بن گئی ہے جیل بھروتحریک میں کل ملاکر 100، سوا سو آدمی اکٹھے ہوئے ہیں، ان میں سے بھی 80 فیصد ایسے ہیں جو کہتے ہیں ہمیں چھوڑ دیں، وہ کہتے ہیں کہ یہ لوگ ہمیں ورغلاکر لے آئے ہیں۔
رانا ثنا اللہ نے کہا کہ جو جیل جانا چاہتا ہے اس کو جیل ہی بھیجا، بیگار کیمپ نہیں بھیجا، سب کو 30،30 دنوں کےلیے بند کیا گیا ہے، انہوں نے کہا جب جیلیں بھرنی ہیں تو پہلے دوردراز کی جیلیں بھریں گے، ڈی جی خان، راجن پور، مظفرگڑھ اور شاہ پور کی جیلوں میں کافی گنجائش ہے، اس کے بعد لاہور، فیصل آباد اور راولپنڈی کی جیلیں بھریں گے۔
وزیر داخلہ نے کہا کہ پرویز الہٰی کہہ رہے تھے کہ فلاں کیس فلاح جج کے پاس لگانا ہے، ہمارا موقف ہے از خود نوٹس لیتے ہوئے اس کی انکوائری کی جائے، پرویزالہٰی نے جج کے ساتھ تعلق کا تاثر کیوں دیا؟ انہوں نے کہا کہ تحقیقات تک کسی معزز جج پر الزام لگانے کے حق میں نہیں ہوں۔
