اسلام آباد (نئی تازہ رپورٹ) سکیورٹیز اینڈ ایکسچینج کمیشن آف پاکستان نے خبردار کیا ہے کہ “منی باکس” اور “منی کلب” نام کی قرض فراہم کرنے والی ایپس غیر منظور شدہ ہیں، شہری کسی قسم کے لین دین سے گریز کریں۔
ایس ای سی پی کے مطابق مذکورہ دونوں ایپس غیر منظور شدہ ہیں اور قرض خواہوں کو نقصان پہنچا سکتی ہیں۔ بیان کے مطابق ایس ای سی پی کے علم میں آیا ہے کہ مندرجہ بالا دونوں ایپس صارفین کا اعتماد حاصل کرنے کے لئے لائسنس یافتہ نان بینکنگ فنانس کمپنیز کا نام استعمال کر رہی ہیں ۔
بیان کے مطابق ایس ای سی پی کی جانب سےکسی بھی لائسنس یافتہ نان بینکنگ فنانس کمپنی کو “منی باکس” اور “منی کلب” نامی ایپس لانچ کرنے کی اجازت نہیں دی گئی ہے۔سکیورٹیز اینڈ ایکسچینج کمیشن کے مطابق قانون کے مطابق لائسنس یافتہ نان بینکنگ فنانس کمپنیز کوئی بھی ایپ ایس ای سی پی کی منظوری حاصل کرنے کے بعد ہی جاری کر سکتی ہیں۔
