راولپنڈی (نئی تازہ رپورٹ) قومی احتساب بیورو ( نیب) نے چیئرمین پی ٹی آئی سابق وزیر اعظم عمران خان اور بشریٰ بی بی کو توشہ خانہ کیس میں طلب کر لیا۔نیب راولپنڈی نے 9 مارچ کی طلبی کا نوٹس جاری کیا، قومی احتساب بیورو نے 8 نومبر 2022 کو چیئرمین پاکستان تحریک انصاف کے خلاف توشہ خانہ کیس کی تحقیقات شروع کی تھیں جس کے بعد کابینہ ڈویژن اور سرکاری توشہ خان سے عمران خان کے تحائف کا ریکارڈ حاصل کیا گیا۔
ذرائع کے مطابق کابینہ ڈویژن، سرکاری توشہ خانہ کے افسران کا ابتدائی بیان بھی قلمبند کر لیا گیا ہے، ڈی جی نیب راولپنڈی توشہ خانہ کیس کی تحقیقات کی نگرانی کر رہے ہیں۔ نیب نے توشہ خانہ کیس میں سابق وزیر اعظم کی اہلیہ بشریٰ بی بی، اور پی ٹی آئی رہنمائوں فواد چودھری اور شاہ محمود قریشی کو بھی طلب کیا ہے، جبکہ کیس کی تحقیقات کیلئے ٹیم دبئی بھیجنے کا فیصلہ کیا گیا ہے، تحقیقات کرنے والی نیب کی ٹیم جلد متحدہ عرب امارات روانہ ہوگی۔
