اسلام آباد ( نئی تازہ نیوز)حکومت نے بجلی صارفین پر پاور ہولڈنگ لیوی عائد کرنے کا فیصلہ کیا ہے،اقتصادی رابطہ کمیٹی.
( ای سی سی)نے فی یونٹ 3.82 روپے لیوی عائد کرنے کی منظوری دے دی ہے۔
حکومتی ذرائع کے مطابق بجلی کی فی یونٹ قیمت پر لیوی کا نفاذمرحلہ وار ہوگا جس کے لئےنیشنل الیکٹرک پاور ریگولیٹری اتھارٹی نیپرا سے منظوری لی جائے گی۔ذرائع کے مطابق فروری اورمارچ کے لیے 43 پیسے پاور ہولڈنگ لیوی عائد کرنے کی منظوری دی گئی ہے جب کہ مارچ سے جون تک 3.39 روپے اضافی لیوی شامل کرنے کا فیصلہ ہوا ہے ، جولائی سے اکتوبر تک 43 پیسے کے ساتھ مزید ایک روپے لیوی( ٹیکس) عائد ہو گا اور 3.39 روپے لیوی ختم ہوجائے گا۔ اسی طرح نومبر 2023ء سے جون 2024ء تک 1.43 روپے لیوی عائد رہے گا۔
پاور ہولڈنگ لیوی کا اطلاق 300 یونٹ سے کم بجلی استعمال کرنے والے صارفین پر نہیں ہوگا، لائف لائن صارفین اور کے الیکٹرک کے بجلی صارفین بھی پاورہولڈنگ لیوی سے مستثنیٰ ہوں گے۔ حکومت نے سیلاب متاثرین اور زرعی صارفین کے لیے 2.75 روپے فی یونٹ ریلیف ختم کرنے کا فیصلہ کیا ہے۔ تا کہ آمدن بڑھا کر آئی ایم ایف کو مطمئن کیا جا سکے۔
