اسلام آباد ( نئی تازہ رپورٹ) وزیراعظم شہبازشریف نے پشاور مسجد میں دھماکے کی مذمت کرتے ہوئے پاکستان کے خلاف جنگ کرنے والوں کو صفحہ ہستی سے مٹا نے کے عزم کا اظہار کیا ہے ۔
پشاور کی پولیس لائنز مسجد میں دھماکے کی مذمت کرتے ہوئے وزیراعظم شہبازشریف نے شہداء کے درجات کی بلندی اور زخمیوں کی جلد صحت یابی کے لئے دعا کی . انہوں نے کہا کہ اللہ کے حضور سربسجود مسلمانوں کا بہیمانہ قتل قرآن کی تعلیمات کے منافی ہے، اللہ کے گھر کو نشانہ بنانا ثبوت ہے کہ حملہ آوروں کا اسلام سے کوئی تعلق نہیں۔
وزیراعظم نے کہا کہ دہشت گرد پاکستان کا دفاع کرنے والوں کو نشانہ بنا کر خوف پیدا کرنا چاہتے ہیں، پاکستان کے خلاف جنگ کرنے والوں کو صفحہ ہستی سے مٹا دیں گے، ناحق شہریوں کا خون بہانے والوں کو عبرت کا نشان بنائیں گے۔وزیراعظم شہبازشریف نے کہا کہ دہشت گردی کے خاتمے کے لئے پوری قوم اور ادارے یکسو اور متحد ہیں، اور اپنے شہداء کو سلام عقیدت پیش کرتے ہیں۔وزیراعظم نے کہا کہ خیبرپختونخوا میں امن وامان کی بگڑتی صورتحال پر جامع حکمت عملی اپنائیں گے، انسداد دہشت گردی کی صلاحیت بڑھانے میں صوبوں سے تعاون کریں گے، اس حوالے سے وزیر داخلہ کو صوبوں کی مدد کرنے کا کہا ہے۔
