اسلام آباد( نئی تازہ رپورٹ) سابق صدر آصف علی زرداری نے الزامات عائد کرنے پر چیئرمین پاکستان تحریک انصاف عمران خان کو قانونی نوٹس بھجوادیا۔ سابق صدر کی جانب سے سابق وزیراعظم عمران خان کو 10 ارب روپے ہرجانے کا قانونی نوٹس بھجوایا گیا ہے جس میں ان سے 14 دن میں غیرمشروط معافی مانگنے کا مطالبہ کیا گیا ہے ۔ آصف زرداری کی جانب سے قانون نوٹس فاروق ایچ نائیک نے بھجوایا جس میں کہا گیا ہےکہ 27 جنوری کو پی ٹی آئی چیئرمین نے میڈیا پر خطاب میں سابق صدر پر الزام لگایا کہ انہوں نے عمران خان کے قتل کا منصوبہ بنایا ہے۔
نوٹس میں پوچھا گیا کہ کیا عمران خان کے پاس ٹھوس ثبوت ہیں؟ یہ الزام اور بہتان ہے، اس سے کئی شکوک و شبہات پیدا ہوئے ہیں لہٰذا عمران خان عدالت کو اس پر واضح مؤقف دیں اور ثبوت سامنے لائے جائیں۔نوٹس میں مزید کہا گیا ہےکہ عمران خان کی جانب سے معافی نہ مانگنےکی صورت میں شہرت کوپہنچنے والے نقصان کا ازالہ کیا جائے۔ اور دس ارب روپے ادا کئے جائیں-
