اسلام آباد (نئی تازہ ڈیسک) پاکستان میڈیکل اینڈ ڈینٹل کونسل (پی ایم ڈی سی) نے ملک بھر میں ایم بی بی ایس اور بی ڈی ایس پروگراموں میں داخلے کے لیے میڈیکل اینڈ ڈینٹل کالج ایڈمیشن ٹیسٹ (ایم ڈی کیٹ) 2026 کا شیڈول جاری کر دیا۔
پی ایم ڈی سی کی طرف سے جاری کردہ عوامی نوٹیفکیشن کے مطابق، ایم ڈی کیٹ 2026 کا امتحان 16 اگست 2026 بروز اتوار صبح 10 بجے پورے ملک میں بیک وقت منعقد کیا جائے گا۔
کونسل نے مختلف جامعات کو ان کے متعلقہ علاقوں میں ٹیسٹ انعقاد کی ذمہ داری سونپی ہے۔ پنجاب میں یونیورسٹی آف ہیلتھ سائنسز (یو ایچ ایس) لاہور، سندھ میں سکھر آئی بی اے یونیورسٹی، خیبرپختونخوا میں خیبر میڈیکل یونیورسٹی (کے ایم یو) پشاور، اور بلوچستان میں بولان یونیورسٹی آف میڈیکل اینڈ ہیلتھ سائنسز (بی یو ایم ایچ ایس) کوئٹہ کو ٹیسٹ کروانے کا چارج دیا گیا ہے۔
اسلام آباد، آزاد جموں و کشمیر، گلگت بلتستان اور سعودی عرب کے شہر ریاض سے تعلق رکھنے والے امیدواروں کے لیے ٹیسٹ شہید ذوالفقار علی بھٹو میڈیکل یونیورسٹی (ایس زیڈ اے بی ایم یو) اسلام آباد کی نگرانی میں ہوگا۔
یہ بھی پڑھیں: وزیراعظم کا قوم کے لیے بڑا ریلیف: پیٹرول 74، ڈیزل 67 روپے سستا کرنے کا اعلان
پی ایم ڈی سی کا کہنا ہے کہ آن لائن رجسٹریشن کا آغاز 22 جون 2026 سے ہوگا۔ امیدوار معمول کی فیس کے ساتھ 8 جولائی تک درخواستیں جمع کرا سکیں گے، جبکہ لیٹ رجسٹریشن کی سہولت 13 جولائی تک دستیاب ہوگی۔
ملک کے ٹیسٹ سینٹرز کے لیے رجسٹریشن فیس 9 ہزار روپے مقرر کی گئی ہے، جبکہ لیٹ رجسٹریشن کی فیس 13 ہزار روپے ہوگی۔ بین الاقوامی ٹیسٹ سینٹرز کے لیے رجسٹریشن فیس 45 ہزار روپے اور لیٹ رجسٹریشن فیس 55 ہزار روپے رکھی گئی ہے۔
کونسل نے واضح کیا ہے کہ تمام فیسز ناقابلِ واپسی اور ناقابلِ منتقلی ہوں گی۔ امیدواروں کو ہدایت کی گئی ہے کہ وہ اپنی رجسٹریشن مقررہ مدت میں مکمل کریں اور داخلہ ٹیسٹ سے متعلق تازہ معلومات اور ہدایات کے لیے متعلقہ جامعات کی ویب سائٹس پر باقاعدگی سے وزٹ کریں۔
