لاہور( نئی تازہ نیوز) وزیر اعلیٰ پنجاب مریم نواز شریف نے صوبے کے عوام کو ایک ریلیف دیتے ہوئے 13 نئے ماڈل بازاروں کے قیام کا اعلان کیا ہے۔ ان بازاروں میں معیاری اشیاء کم قیمتوں پر دستیاب ہوں گی۔
ان نئے ماڈل بازاروں کا آغاز اوکاڑہ، مظفرگڑھ، خانیوال، جہلم، نارووال، چنیوٹ، منڈی بہاؤالدین، وزیر آباد، جڑانوالہ (ضلع فیصل آباد)، بھلوال (ضلع سرگودھا)، چونیاں ، پتوکی (ضلع قصور) اور شرقپور شریف (ضلع شیخوپورہ) میں کیا جارہا ہے۔
وزیر اعلیٰ مریم نواز شریف کے مطابق ان بازاروں کا مقصد عوام کو سستی اور معیاری اشیاء کی فراہمی کو یقینی بنانا ہے۔ انہوں نے مزید کہا کہ حکومت پنجاب عوام کی فلاح و بہبود کے لیے ہر ممکن اقدامات کر رہی ہے اور ان ماڈل بازاروں کا قیام بھی اسی سلسلے کی ایک کڑی ہے۔
واضح رہے کہ ماڈل بازاروں میں روزمرہ استعمال کی اشیاء، پھل، سبزیاں، گوشت، اور دیگر ضروریات زندگی کی چیزیں دستیاب ہوں گی۔ ان بازاروں میں اشیاء کی قیمتیں عام بازاروں سے کم ہوں گی جس سے عام آدمی کو فائدہ پہنچے گا۔
