پنجاب حکومت نے مزید 19 شہروں میں سیف سٹی کیمروں کی تنصیب کی منظوری دے دی۔ کیمرے لگانے کا کام جون 2025 تک مکمل کر لیا جائے گا۔
میڈیا رپورٹ کے مطابق سیف سٹیز حکام نے بتایا کہ صوبے کے مزید 19 شہروں میں سیف سٹی کیمروں کی تنصیب کی جائے گی، جن میں وہاڑی، لیہ، تونسہ،لودھراں، بہاولنگر، چنیوٹ، ٹوبہ ٹیک سنگھ، جہلم سمیت دیگر شہرشامل ہیں، حکام کے مطابق 19 شہروں میں 5 ہزار سے زائد کیمرے نصب کیے جائیں گے، تمام شہروں کے کیمروں کی سینٹرلائزڈ مانیٹرنگ ہیڈ کوارٹر لاہور سے کی جائے گی۔
سیف سٹیز حکام کے مطابق لاہور کے ساتھ دیگر شہروں کے سیف سٹی کیمروں سے مانیٹرنگ کے لئے اضافی ویڈیو وال بنائی جائے گی،بتایا گیا ہے کہ کیمروں کی نیٹ ورکنگ پر سوا 5 ارب روپے کی لاگت آئے گی، 19 شہروں میں جون 2025 تک کیمروں کی تنصیب کا عمل مکمل کر لیا جائے گا۔
حکام کے مطابق کیمروں کی تنصیب کے پہلے مرحلے میں شیخوپورہ، سیالکوٹ، گجرات، راولپنڈی، مریدکے اور گوجرانوالہ سمیت اٹھارہ شہروں میں کیمرے لگائے جا رہے ہیں،پہلے مرحلے کے متعدد شہروں میں کیمرے فعال ہوچکے ہیں جبکہ باقی شہروں میں کام جلد مکمل کر لیا جائےگا۔
