چاند پر چین کی مدد سے بھیجے گئے پاکستان کے پہلے سیٹلائٹ آئی کیوب قمرسے پہلی تصویرموصول ہوگئی۔
چینی خلائی مرکز نے آئی کیوب قمر کی طرف سے بھجوائی گئی تصویر پاکستانی سفیر کے حوالے کر دی، آئی کیوب قمر نے لانچ کے ایک ہفتہ بعد چاند کے مدار سے جو پہلی تصویربھجوائی وہ سورج کی ہے۔ تصویر میں سورج کی روشنی نظر آ رہی ہے۔
پاکستان کے خلائی تحقیق کے ادارے سپارکو کے مطابق چاند کے مدار میں داخل ہونے والا پاکستانی سیٹلائٹ 12گھنٹے میں چاند کا مکمل چکر لگائے گا،آئی کیوب قمر چاند کے مدار میں سطح سے دو سو کلومیٹر کے فاصلے سے منظر کشی کرے گا، آئی کیوب قمر سیٹلائٹ کے سگنلز چار لاکھ کلومیٹرتک کا فاصلہ طے کرنے کے بعد زمین پر موصول کئے جائیں گے۔
ترجمان سپارکوکے مطابق آئی کیوب قمر نے چاند کے گرد 3 چکر لگا لئے ہیں، پاکستانی مشن تین سے چھ ماہ تک چاند کے مدار میں گردش کرے گا۔
سپارکوکے مطابق مدار پر پہنچے کے بعد سیٹلائٹ منصوبے کے مطابق کارکردگی کا مظاہرہ کر رہا ہے ، تمام ذیلی نظاموں کا ڈیٹا بہترین نتائج دے رہا ہے، امیجنگ پے لوڈ پوری طرح فعال ہے۔
واضح رہے پاکستانی سیٹلائٹ آئی کیوب قمر 3مئی 2024 کو چین کے شہر ہینان کے وینچنگ خلائی سینٹر سے روانہ ہوا تھا۔
قبل ازیں ماہرین نےکہا تھا کہ سیٹلائٹ امیجنگ سسٹم کے آپریشنل ہونے سے قبل تمام ذیلی نظاموں کی تصدیق میں تقریباً ایک ہفتہ لگ سکتا ہے، اور امکان ہے کہ آئی کیوب قمر سے چاند کی پہلی تصویر 15 یا 16 مئی تک موصول ہو گی۔ تاہم توقع سے پہلے ہی آئی کیوب قمر سے بھیجی گئی تصویر موصول ہو گئی ہے۔
