راولپنڈی ( نئی تازہ رپورٹ) راولپنڈی میں خاتون ٹیچرسے ڈکیتی اور تشدد کی واردات کا ایک ملزم مبینہ پولیس مقابلے میں گرفتار جبکہ دوسرا فرار ہوگیا۔
پولیس کے مطابق تھانہ وارث خان کے علاقہ حکمداد میں دو روز قبل خاتون سے لوٹ مار کرنے والے دونوں ڈاکو بھائی ہیں۔ خاتون کے ساتھ سنگین واردات میں ملوث ڈاکوؤں نے رات گئے پولیس پارٹی پر فائرنگ کی ، جوابی فائرنگ کے دوران ایک ڈاکو زخمی حالت میں گرفتار کرلیا گیا جب کہ دوسرا فرار ہو گیا۔
راولپنڈی پولیس نے مشکوک موٹر سائیکل کو رُکنے کا اشارہ کیا توسوار ڈاکوؤں نے پولیس پر فائرنگ کر دی۔ اس دوران مبینہ مقابلے کے بعد ایک ڈاکو کوزخمی حالت میں گرفتار کر لیا گیاجس کی شناخت حمزہ کے نام سے ہوئی، ملزم کے قبضے سے پستول اور زیر استعمال موٹر سائیکل برآمد کرلی گئی۔
گرفتار ڈاکو نے ابتدائی تفتیش میں وارث خان کے علاقے میں خاتون ٹیچر سے ڈکیتی اور تشدد کی واردات کا اعتراف کیا ہے۔ ملزم نے انکشاف کیا کہ واردات میں شامل دوسرا ساتھی اس کا بھائی تھا۔ واقعے کی اطلاع پر سینئر پولیس افسران موقع پر پہنچ گئے اور فرار ملزم کی گرفتاری کے لیے ناکہ بندی کر کے سرچنگ شروع کر دی گئی ہے۔
نجی تی وی نے پولیس ذرائع کے حوالے سے بتایا کہ ملزمان کا تعلق صادق آبادراولپنڈی کے علاقے سے ہے۔ ملزمان اس سے قبل دیگر وارداتوں میں بھی ملوث رہے،انہوں نے تھانہ نیو ٹاؤن کے علاقے میں بھی بزرگ خاتون سے بالیاں نوچی تھیں۔ جبکہ تھانہ صادق آباد کے علاقے کھنہ میں بھی خاتون کے ساتھ واردات میں ملوث تھے۔زخمی ڈاکو کو ہسپتال منتقل کردیا گیا ہے۔
واضح رہے کہ راولپنڈی میں خاتون ٹیچر سے ڈکیتی اور تشدد کے واقعہ نے دو روزقبل سوشل میڈیا پر ؤیڈیو وائرل ہونے سے اعلیٰ حکام کی توجہ حاصل کی تھی اور آئی جی پنجاب نے اس کا نوٹس لیا تھا۔
