راولپنڈی ( نئی تازہ رپورٹ) چیف آف آرمی ستاف جنرل عاصم منیر سے قائم مقام افغان وزیرخارجہ امیرخان متقی نے ملاقات کی ۔
آئی ایس پی آر کے مطابق ملاقات میں علاقائی سلامتی، بارڈر مینجمنٹ اور موجودہ سیکیورٹی ماحول میں بہتری کے لیے دوطرفہ سیکیورٹی میکنزم کو باقاعدہ بنانے کے پہلوؤں پر تبادلہ خیال کیا گیا۔
سربراہ پاک فوج نے دہشت گردی اور انتہا پسندی کے مشترکہ چیلنجوں سے مؤثر طریقے سے نمٹنے کے لیے دونوں برادر ہمسایوں کے درمیان تعاون بڑھانے کی ضرورت پر زور دیا۔ انہوں نے باہمی دلچسپی کے امور میں افغان عبوری حکومت کی جانب سے مکمل حمایت اور عزم کی ضرورت کا اعادہ کیا۔
افغان وزیر خارجہ متقی نے افغانستان کے عوام کے لیے پاکستان کی روایتی حمایت کو سراہا اور افغانستان میں امن اور ترقی میں سہولت کاری کے لیے پاکستان کے اہم کردار ادا کرنے کا اعتراف کیا۔ انہوں نے علاقائی استحکام اور خوشحالی کے فروغ کے لیے پاکستان کے ساتھ مل کر کام کرنے کی خواہش کا بھی اظہار کیا۔
آئی ایس پی آر کے مطابق فریقین نے نے دوطرفہ تعلقات کو مضبوط بنانے اور مشترکہ مسائل کو حل کرنے کے لیے باقاعدہ رابطوں کو برقرار رکھنے کی اہمیت پر اتفاق کیا۔
جنرل عاصم منیر نے ایک مستحکم، پرامن اور خوشحال افغانستان کے لیے پاکستان کے عزم کا اعادہ کیا۔
