لندن ( نئی تازہ رپورٹ) وزیر اعظم شہباز شریف نےواضح کیا ہے کہ ملک میں الیکشن ایک ہی دن ہوں گے، پارلیمنٹ اپنے دائرے میں رہ کراپنا حق منوائے گی۔ پارلیمنٹ کے استحقاق اور آئینی اختیارکا ہرصورت تحفظ کریں گے، ثاقب نثار پی ٹی آئی کے سیاسی ایجنٹ کے طور پر کام کرتے رہے، آڈیو لیکس نے تمام کرداروں کو بے نقاب کردیا۔
مسلم لیگ ن کے سربراہ اور سابق وزیر اعظم میاں نواز شریف سے ملاقات کے بعد لندن میں صحافیوں سے گفتگو کرتے ہوئے شہباز شریف نے کہا کہ ثاقب نثار نے نوازشریف کو نااہل کرنے میں کلیدی کردار ادا کیا، نوازشریف کو جھوٹے اور بے بنیاد الزامات پر نااہل کیا، ثاقب نثار نے دن رات سوموٹو کا اختیار استعمال کیا، عوامی مفاد کے کسی کیس پر سوموٹو نہیں لیا۔
وزیراعظم نے کہا کہ ثاقب نثار کا مقصد نوازشریف کو ہرانا اور عمران خان کو کامیاب کرنا تھا، سابق چیف جسٹس پر تنقید جاری رکھتے ہوئے شہباز شریف نے کہا کہ ثاقب نثار پی ٹی آئی کے سیاسی ایجنٹ کے طور پر کام کرتے رہے، آڈیو لیکس نے اب تمام کرداروں کو بے نقاب کردیا، ان کے بیٹے کی آڈیو لیک سامنے آئی ، کیا کوئی شک رہ جاتا ہے کہ سازش ہے کہ کسی طریقے سے دوبارہ عمران خان کو لایا جائے۔؟ ثاقب نثار کے بیٹے کی آڈیو کا معاملہ پارلیمنٹ نے اٹھایا ہے اور ان کے بیٹے کو پارلیمانی کمیٹی نے طلب کرلیا ہے۔
شہباز شریف نے کہا کہ ملک میں الیکشن ایک دن ہوں گے اور ایک دن ہی ہونے چاہئیں، ماضی میں پنجاب سے متعلق جو غلط تاثر قائم کیاجارہا تھا زائل ہوگیا ہے، پنجاب بڑا بھائی نہیں چاروں صوبے برابر ہیں، انہوں نے کہا کہ صرف پنجاب میں الیکشن کے ذریعے پاکستان کے خلاف سازش کی جارہی ہے۔
LONDON: naitaza report
