خضدار( نئی تازہ رپورٹ ) خضدار میں پولیس وین پر ریموٹ کنٹرول بم حملے میں 2 پولیس اہلکار شہید اور دو زخمی ہوگئے۔ پولیس ذرائع کے مطابق پولیس پارٹی کو معمول کی گشت کے دوران جھالاوان کمپلیکس کے قریب نشانہ بنےا گیا جہاں نا معلوم حملہ آوروں نے مقناطیسی بم کے زریعے پولیس گاڑی پر حملہ کیا، بم زوردار دھماکے سے پھٹنے کے نتیجے میں پولیس ڈرائیور محمد دین موقع پر شہید ہو گئے ۔واقعہ میں تین اہلکار عبدالسلام، صدام اور عبدالطیف زخمی ہو ئے، نعش اور زخمیوں کو گورنمنٹ ٹیچنگ ہسپتال خضدار منتقل کیا گیا جہاں عبدالسلام پولیس کانسٹیبل زخموں کی تاب نہ لاتے ہوئے شہید ہو گئے۔
دھماکے کی اطلاع ملتے ہی ڈپٹی کمشنر خضدار میجر( ر )الیاس کبزئی ڈی آئی جی پولیس پرویز خان عمرانی ایس ایس پی خضدار کیپٹن ر فہد خان کھوسہ اسسٹنٹ کمشنر خضدار محمد جان جمالدینی اور سیکورٹی اہلکار موقع پر پہنچ گئے سیکورٹی فورسز نے علاقے کو گھیرے میں لیکر حملہ آوروں کی تلاش شروع کر دی ہے جو حملے کے بعد فرار ہوگئے۔
