لاہور ( نئی تازہ رپورٹ) گورنر پنجاب بلیغ الرحمن نے صوبے میں الیکشن کرانے کے فیصلے کی تشریح اور وضاحت کی کے لئے لاہور ہائیکورٹ میں درخواست دائر کرنے کا فیصلہ کیا ہے۔
لاہور ہائیکورٹ کے حکم پر پنجاب میں انتخابات کی تاریخ کے حوالے سے الیکشن کمیشن وفد نے گورنر پنجاب بلیغ الرحمن سے گورنرہاؤس پنجاب میں ملاقات کی۔ ملاقات میں پنجاب اسمبلی کے انتخابات کے انعقاد سے متعلق مختلف پہلوؤں کا جائزہ لیا گیا۔ اس موقع پر چیف سیکرٹری اور آئی جی پنجاب بھی موجود تھے۔ چیف سیکرٹری اور آئی جی پنجاب نے صوبے میں انتظامی امور اور امن و امان کی صورتحال بارے بریفنگ دی۔
اجلاس میں فیصلے کی تشریح اور وضاحت کے لیے لاہور ہائیکورٹ سے رجوع کرنے کا فیصلہ کیا گیا۔ذرائع کے مطابق گورنر پنجاب لاہور ہائی کورٹ میں درخواست دائر کریں گے اور سنگل بنچ کے فیصلے کے قانونی دائرہ کار کو چیلنج کریں گے۔گورنر لاہور ہائی کورٹ سے فیصلے کی تشریح کی درخواست کرکے پوچھیں گے کہ الیکشن تاریخ سے متعلق فیصلہ گورنر پنجاب پرکیسے لاگو ہوتاہے۔ذرائع کے مطابق گورنرپنجاب اورالیکشن کمیشن کے وفد کے اجلاس میں الیکشن کی تاریخ طے نہیں ہوسکی ۔
واضح رہے کہ لاہور ہائی کورٹ نے الیکشن کمیشن کو گورنر سے مشاورت کر کے پنجاب میں الیکشن کی تاریخ کے اعلان کا نوٹیفکیشن جاری کرنے کا حکم دیاتھا۔
