ٹوکیو( نئی تازہ مانیٹرنگ) جاپان کی حکومت ملک کی کم شرح آبادی سے پریشان،زیادہ بچے پیدا کرنے کی ترغیب دینے کے لیے ہنگامی بنیادوں پر کام کرنے کی ہدایت کردی.
غیر ملکی میڈیا کے مطابق جاپانی وزیراعظم فومیو کیشیدا نے ملک کی شرح آبادی میں تشویشناک حد تک کمی کا نوٹس لیتے ہوئے کہا ہے کہ جاپان کی سکڑتی ہوئی آبادی کو روکنا ضروری ہوگیا ہے۔
وزیراعظم فومیو کیشیدا نے جاپان میں زیادہ بچے پیدا کرنے کی ترغیب دینے کے لیے ہنگامی بنیادوں پر کام کرنے کی ہدایت کی ہے. انہوں نے کہا کہ یہ معاملہ ابھی یا کبھی نہیں کی بنیادوں پر حل کیا جانا چاہیے۔
اس سے قبل پارلیمنٹ سے اپنےخطاب میں وزیراعظم نے کہا تھا کہ وہ جون تک بچوں سے متعلق پالیسی کے لیے بجٹ کو بڑھا کر دوگنا کرنے کے منصوبے پیش کریں گے اور اس معاملے کی نگرانی کے لیے بچوں اور خاندانوں سے متعلق ایک نئی سرکاری ایجنسی اپریل میں قائم کردی جائے گی۔
وزیراعظم فومیو کیشیدا نے کہا کہ ہماری قوم اس بات کے دہانے پرکھڑی ہے کہ آیا وہ اپنے سماجی افعال کو برقرار رکھ سکتی ہے یا نہیں۔
رپورٹس کے مطابق جاپان میں شرح پیدائشں 8 لاکھ سے کم ہوگئی ہے جو کم ترین سطح ہے۔ اس صورتحال کے تدارک کے لیے جاپانی حکومت زیادہ بچے پیدا کرنے پر نقد بونس اور کئی فوائد کی پیشکش بھی کر ری ہے۔
ایک سروے کے مطابق جاپان بچوں کی پرورش کے معاملہ میں چین اور جنوبی کوریا کے بعد دنیا کا تیسرا مہنگا ترین ملک شمار ہوتا ہے۔
