اسلام آباد( نئی تازہ نیوز) آزاد جموں و کشمیر کے سابق وزیراعظم سردار تنویر الیاس نے اپنے متعدد سیاسی ساتھیوں سمیت استحکام پاکستان پارٹی (آئی پی پی) میں شمولیت اختیار کر لی۔
ان کی شمولیت کا اعلان استحکام پاکستان پارٹی کے صدر عبدالعلیم خان سے ملاقات کے بعد کیا گیا۔ اس موقع پر آزاد کشمیر کے وزیر زراعت چوہدری علی شان سونی، سابق وزیر صحت انصار ابدالی اور سابق مشیر وزیراعظم آزاد کشمیر سردار افتخار رشید نے بھی آئی پی پی میں شمولیت کا اعلان کیا۔
عبدالعلیم خان نے سردار تنویر الیاس اور دیگر رہنماؤں کا پارٹی میں خیرمقدم کرتے ہوئے کہا کہ ان کی شمولیت سے استحکام پاکستان پارٹی مزید مضبوط ہوگی۔ اس موقع پر نئے شامل ہونے والے رہنماؤں نے بھی عبدالعلیم خان کی قیادت پر اعتماد کا اظہار
کیا۔
واضح رہے کہ یہ پیش رفت سردار تنویر الیاس کے پاکستان پیپلز پارٹی (پی پی پی) کی بنیادی رکنیت سے استعفے کے بعد سامنے آئی ہے۔
ذرائع کے مطابق سردار تنویر الیاس نے اپنا استعفیٰ پیپلز پارٹی کے چیئرمین بلاول بھٹو زرداری کو بھجوایا تھا۔ ذرائع کا کہنا ہے کہ وہ آزاد کشمیر میں پارٹی ٹکٹوں کی تقسیم پر تحفظات رکھتے تھے اور ان کے مطابق ٹکٹوں کی تقسیم منصفانہ نہیں تھی۔
ذرائع کے مطابق سردار تنویر الیاس کو وسطی باغ کے حلقے سے پارٹی ٹکٹ جاری نہیں کیا گیا، جس پر انہوں نے پارٹی قیادت کے سامنے اپنے تحفظات کا اظہار کیا۔ بتایا جاتا ہے کہ انہوں نے حتمی فیصلہ کرنے سے قبل اپنے قریبی سیاسی ساتھیوں سے بھی مشاورت کی تھی۔
