لاہور (نئی تازہ رپورٹ) پنجاب بھر کے سرکاری و نجی تعلیمی اداروں میں موسم گرما کی تعطیلات کے حوالے سے محکمہ سکول ایجوکیشن نے ابتدائی ہوم ورک مکمل کر لیا ہے۔ ذرائع کے مطابق صوبے میں بڑھتی ہوئی گرمی اور ہیٹ ویو کے خدشات کو مدنظر رکھتے ہوئے تعطیلات کا آغاز 25 مئی سے کیے جانے کا قوی امکان ہے، جس کے لیے ابتدائی تاریخ فائنل کر لی گئی ہے۔ محکمہ تعلیم اس حوالے سے باقاعدہ سمری جلد ہی صوبائی حکومت کو ارسال کرے گا، جس کی حتمی منظوری کے بعد باضابطہ نوٹیفکیشن جاری کیا جائے گا۔
ذرائع کی جانب سے موصول ہونے والی اطلاعات کے مطابق، اس بار موسم گرما کی تعطیلات کا دورانیہ طویل ہونے کی تجویز دی گئی ہے اور تعلیمی ادارے 16 اگست تک بند رہنے کا امکان ظاہر کیا جا رہا ہے۔ محکمہ کے حکام کا کہنا ہے کہ مون سون کی بارشوں اور موسم کی مجموعی صورتحال کو دیکھ کر اگست کے وسط تک چھٹیاں دی جا سکتی ہیں تاکہ بچوں کو شدید حبس اور گرمی سے بچایا جا سکے۔ تاہم، اس تجویز بارے حتمی فیصلہ وزیرِ اعلیٰ پنجاب کی منظوری کے بعد ہو گا۔
دوسری جانب، صوبائی وزیر تعلیم رانا سکندر حیات نے اس حوالے سے جاری غیر یقینی صورتحال پر اپنا موقف واضح کر دیا ہے۔ ان کا کہنا ہے کہ پنجاب کے سکولوں میں موسم گرما کی تعطیلات کے حوالے سے تاحال کوئی حتمی فیصلہ نہیں کیا گیا، بلکہ اس وقت محکمہ کے پاس تین سے چار مختلف تجاویز زیرِ غور ہیں۔ انہوں نے واضح کیا کہ حکومت کی ترجیح بچوں کی تعلیم کے ساتھ ساتھ ان کی صحت بھی ہے، اسی لیے تمام پہلوؤں کا باریک بینی سے جائزہ لیا جا رہا ہے۔
رانا سکندر حیات نے مزید بتایا کہ گرمی کی شدت اور امتحانی شیڈول کو سامنے رکھتے ہوئے آئندہ چند روز میں سر جوڑ کر بیٹھا جائے گا اور چھٹیوں کا حتمی اعلان کیا جائے گا۔ انہوں نے والدین اور طلبہ کو مشورہ دیا ہے کہ وہ سوشل میڈیا پر گردش کرنے والی افواہوں پر کان دھرنے کے بجائے حکومت کے سرکاری اعلان کا انتظار کریں، محکمہ تعلیم طلبہ کے بہترین مفاد میں ہی کوئی فیصلہ کرے گا۔
