مرکزی رویت ہلال کمیٹی نے محرم الحرام 1447 ہجری کے چاند کی رویت کے لیے اجلاس طلب کر لیا ہے۔
ترجمان وزارت مذہبی امور کے مطابق یہ اجلاس جمعرات 26 جون 2025 کو کوئٹہ میں ڈی سی آفس میں نماز عصر کے بعد منعقد ہو گا، جس کی صدارت مرکزی رویت ہلال کمیٹی کے چیئرمین مولانا سید محمد عبدالخبیر آزاد کریں گے۔ زونل رویت ہلال کمیٹیوں کے اجلاس ان کے متعلقہ صوبائی دارالحکومتوں میں ہوں گے۔
اسلام آباد میں زونل کمیٹی کا اجلاس کوہسار بلاک میں ہو گا۔ چاند نظر آنے یا نہ آنے کا باضابطہ اعلان مرکزی کمیٹی کے چیئرمین کریں گے۔
دوسری جانب سپارکو نے اپنی پیشگوئی جاری کرتے ہوئے بتایا ہے کہ 26 جون کو غروب آفتاب کے وقت چاند کی عمر تقریباً 28 گھنٹے 15 منٹ ہو گی۔ ترجمان کے مطابق ملک کے ساحلی علاقوں میں غروب آفتاب اور چاند کے غروب ہونے کے درمیان وقفہ 75 منٹ ہوگا، جو چاند کی رویت کے لیے انتہائی موزوں ہے۔
سپارکو کا کہنا ہے کہ فلکیاتی تجزیے کی روشنی میں 26 جون کی شام موسم صاف ہونے کی صورت میں محرم کا چاند نظر آنے کے قوی امکانات ہیں، اس لیے یکم محرم الحرام 1447 ہجری 27 جون 2025 کو ہونے کی توقع ہے۔
