لاہور ایئرپورٹ پر آتشزدگی کے نتیجے میں امیگریشن سسٹم کو نقصان پہنچا جس کی وجہ سے پہلی حج فلائٹ سمیت متعدد پروازیں تاخیر کا شکار ہو گئیں۔
میڈیا رپورٹ کے مطابق علامہ اقبال انٹرنیشنل ایئرپورٹ لاہور کے ایف آئی اے امیگریشن ہال میں اچانک آگ بھڑک اٹھی اور پورے حصے کواپنئ لپیٹ میں لے لیا، بتایا گیا ہے کہ آگ امیگریشن کاؤنٹر کی سیلنگ میں شارٹ سرکٹ کی وجہ سے لگی، جس سے امیگریشن سسٹم جل گیا
۔
آگ کے باعث وہاں موجود مسافروں میں بھگدڑ مچ گئی،انتظامیہ نے امیگریشن ہال خالی کروا لیا۔
آگ سے امیگریشن ہال کے ارد گرد دھواں جمع ہوگیا ، آتشزدگی کے بعد امیگریشن کا عمل روک دیا گیا جس کی وجہ سے متعدد پروازیں تاخیر کا شکار ہوئیں، لاہور سے جانے والی پہلی حج پرواز کو بھی روک لیا گیا۔
آگ سے امیگریشن کا عمل متاثر ہونے کی وجہ سے عازمین حج کی امیگریشن کا عمل ڈومیسٹک کاؤنٹر سےکیا گیا ۔
آتشزدگی کی اطلاع ملنے پر ریسکیو اور فائر بریگیڈ کا عملہ موقع پر پہنچ گیا اور کئی گھنٹوں کی کوششوں کے بعد آگ پر قابو پا لیا، ابتدائی طور پر آگ لگنے کی وجہ شارٹ سرکٹ بتائی گئی ہے۔
