لاہور( نئی تازہ رپورٹ) بجلی کی تقسیم کار کمپنیوں نے گھریلو صارفین کے لیے بجلی کے کنکشن کی سکیورٹی فیس 1220 روپے سے بڑھا کر 18 ہزار روپے کرنے کی تیاری کر لی ۔
نیشنل الیکٹرک پاور ریگولیٹری اتھارٹی (نیپرا) کےذرائع کے مطابق تقسیم کار کمپنیوں کی طرف سے کنکشن فیس میں بھاری اضافے کی درخواست کی گئی ہے، جس کے تحت 10 کلو واٹ سے کم لوڈ پر صارفین کو 20 ہزار روپے فی کلو واٹ ادائیگی کرنا ہوگی ، جبکہ سنگل فیز میٹر پر کنکشن لینے کے لیے صارفین کو 24 ہزار روپے تک ادا کرنا ہوں گے۔
دیہی علاقوں میں سکیورٹی فیس 610 سے بڑھا کر 7800 روپے فی کلو واٹ کرنے کی درخواست کی گئی ہے، 10 مرلہ سے زائد کے گھر پر صارفین کو پراپرٹی ریٹ کا ایک فیصد ادا کرنا پڑے گا۔
نیپرا ذرائع کے مطابق صنعتی صارفین، اسٹریٹ لائٹس اور ہاؤسنگ سوسائٹیز کے لیے بھی سکیورٹی فیس میں غیر معمولی اضافہ تجویزکیا گیا ہے جس کے تحت کمرشل اور چھوٹی صنعت کی فیس 2010 روپے سے بڑھا کر 57000 روپے فی کلوواٹ کرنےکی درخواست کی گئی ہے۔
معلوم ہوا ہے کہ وزارت پاور ڈویژن نے 3 ماہ کے بلوں کے مطابق سکیورٹی فیس بڑھانے کا فیصلہ کیا ہے تاہم نیپرا میں سماعت کے بعد حتمی فیصلہ کیا جائے گا ۔
