اسلام آباد ( نئی تازہ رپورٹ) نگران وفاقی کابینہ کا اجلاس آج پیر کو ہو گا ،جس میں 14 نکاتی ایجنڈے پر غور کیا جائے گا۔
نگران وفاقی کابینہ کا اجلاس وزیراعظم انوار الحق کاکڑ کی زیر صدارت وزیر اعظم ہاؤس میں ہوگا۔
اجلاس میں حج پالیسی 2024ء اور حج و عمرہ ریگولیشن بل 2023ء کابینہ کی منظوری کیلئے پیش ہوں گے، فلائی جناح ایر لائن کو بین الاقوامی روٹس فراہم کرنے سے متعلق امور کا جائزہ لیا جائے گا جبکہ غیر ملکی غیر قانونی باشندوں کی وطن واپسی بارے احکامات کی منظوری بھی ایجنڈے کا حصہ ہے۔
وفاقی کابینہ کے اجلاس میں ملک کی معاشی، سیاسی صورتحال اور امن و امان کا جائزہ بھیلیا جائے گا۔
کابینہ اجلاس میں انکوائری کمیشن برائے لاپتہ افراد کی مدت میں توسیع پر بھی تبادلہ خیال ہو گا،ایجنڈے کے مطابق اجلاس میں ایف آئی اے اور انسداد انسانی سمگلنگ بارے پولیس سٹیشنز کے قیام اور انہیں رولز میں شامل کرنے کی منظوری لی جائے گی۔
پاکستان اور تاجکستان کے درمیان تجارت، برآمدات و درآمدات میں اضافہ سے متعلق معاہدے کی منظوری بھی ایجنڈے کا حصہ ہے، جبکہ ایل این جی اور ایل پی جی خریداری اور کارگو سے متعلق پیپرا رولز میں نرمی کی منظوری بھی ایجنڈے میں شامل ہے۔
ایجنڈے کے مطابق اجلاس میں کابینہ کمیٹی برائے قانون سازی کے 6، 26 اور 27 اکتوبر کے فیصلوں کی توثیقکی جائے گی ۔
