اسلام آباد( نئی تازہ رپورٹ) حکومت نے ساتویں مردم شماری کا فیلڈ آپریشن بند کرنےکا اعلان کر دیا۔ تصدیق کا عمل 15 دن تک جاری رہےگا۔
وفاقی ادارہ شماریات کے ترجمان کے مطابق ساتویں ڈیجیٹل مردم شماری کا فیلڈ آپریشن بند کرنے کا فیصلہ وزیر اعظم کی زیرِ صدارت پاکستان ادارہ شماریات کی اعلیٰ انتظامیہ کے ساتھ ہونے والے اجلاس میں کیا گیا ، تاہم ڈیٹا کی مکمل کوریج کو یقینی بنانے کے لیے تصدیق کا عمل 15 دن تک جاری رہے گا۔
ترجمان سرور گوندل نے کہا کہ تمام ڈپٹی کمشنرز اور اسسٹنٹ کمشنرز مردم شماری کی تکمیل کا سرٹیفکیٹ فراہم کریں گے۔ مردم شماری کے فیلڈ اسٹاف کو ادائیگی ڈپٹی کمشنرز اور اسسٹنٹ کمشنرز کی طرف سے تکمیلی سرٹیفکیٹ کی فراہمی کے بعد کی جائے گی۔
یہ بھی پڑھیں: لکی مروت اور ٹانک میں مردم شماری ٹیموں پر دہشتگردوں کے حملے، 2 پولیس اہلکار شہید، 8 زخمی
انہوں نے بتایا کہ فورسز کے حساس علاقہ جات اور اجتماعی رہائش گاہوں میں مقیم افراد کا اجتما عی ڈیٹا متعلقہ بلاک کی آبادی میں شامل کیا جائے گا.
ڈیموگرافرز کمیٹی نادرا اور سپارکو کی فرانزک آڈٹ رپورٹس کو مدنظر رکھتے ہوئے ڈیموگرافک تکنیک کا استعمال کرتے ہوئے مردم شماری کے اعداد و شمار کا تجزیہ کرنے کے بعد سینسس مانیٹرنگ کمیٹی کی طرف سے غور کے لیے اپنی سفارشات کو حتمی شکل دے گی۔
ترجمان نے کہا کہ نادرا اور سپارکو انڈر اور اوور رپورٹنگ کی نشاندہی کے لیے ڈیموگرافرز کمیٹی کوتکنیکی معاونت فراہم کریں گے۔
ترجمان کے مطابق مردم شماری سپورٹ سینٹرز اور پاکستان ادارہ شماریات کے کال سینٹرز پر عدم کوریج کی شکایات کو شناختی کارڈ نمبراور ضروری معلومات فراہم کرنے پر 30مئی 2023 تک حل کیا جائے گا۔
