راولپنڈی( نئی تازہ رپورٹ) شمالی وزیرستان میں سیکیورٹی فورسز اور دہشت گردوں کے درمیان فائرنگ کے تبادلے میں 6 سیکیورٹی اہلکار شہید ہو گئے، جبکہ تین دہشت گرد مارے گئے۔
پاک فوج کے شعبہ تعلقات عامہ آئی ایس پی آر کے بیان کے مطابق شمالی وزیرستان کے علاقے دیردونی میں پیش آنے والے واقعہ میں سیکیورٹی فورسز نے دہشت گردوں کو مؤثر جواب دیا اور مقابلے میں 3 دہشت گرد بھی مارے گئے۔
بیان کے مطابق دہشتگردوں سے مقابلے میں حوالدار سلیم خان، نائیک جاوید اقبال، سپاہی نذیر خان، سپاہی حضرت بلال، سپاہی سید رجب حسین اور سپاہی بسم اللّٰہ جان شہید ہوگئے۔
آئی ایس پی آر کے مطابق 26 سالہ شہید سپاہی نذیر کا تعلق بنوں اور 25 سالہ سپاہی حضرت بلال کا تعلق مردان سے، 22سالہ سپاہی سید رجب حسین کا تعلق اورکزئی ،22سالہ سپاہی بسم اللّٰہ جان کا تعلق خیبر سے ہے۔
ٹانک کے 36 سالہ حوالدار سلیم خان اور کوہاٹ کے 37 سالہ نائیک جاوید اقبال بھی شہداء میں شامل ہیں۔
آئی ایس پی آر کے مطابق دہشت گردوں کے خاتمے کے لیے علاقے کی کلیئرنس کا عمل جاری ہے۔
