لا ہور (نئی تازہ رپورٹ)پاکستان کرکٹ بورڈ کی مینجمنٹ کمیٹی کے سربراہ نجم سیٹھی نے واضح کیا ہے کہ انہوں نے سابق چیئرمین بورڈ رمیز راجا کو عہدے سے نہیں ہٹوایا ، انہیں خود حکومت تبدیل ہونے پر استعفیٰ دے دینا چاہیے تھا۔
نجی چینل کو دیئے گئے ایک انٹرویو میں سربراہ مینجمنٹ کمیٹی نے کہا کہ جب وفاقی حکومت تبدیل ہوئی تو میں خاموشی سے دیکھتا رہا، میرا خیال تھا کہ راجا صاحب خود مستعفی ہو جائیں گے کیونکہ یہ قابلِ عزت چیز تھی۔
نجم سیٹھی نے کہا کہ جب رمیز راجا مستعفی نہیں ہوئے تو پھر دو آپشنز تھے، یا تو میں حکومت سے کہتا جیسے چھٹی کرائی جاتی ہے ویسے کرائیں اور مجھے لے آئیں کیونکہ یہ آئینی طور پر جائز ہے، دوسرا یہ تھا کہ راجا صاحب تھوڑے اور جھولے لے لیں، دیکھ لیں کہ کیا کرتے ہیں۔
انہوں نے کہا کہ پھر ایک مرحلہ پر یہ ہی فیصلہ ہوا کہ اب رمیز راجہ کے جانے کا وقت آگیا ہے، خود چلے جاتے تو بہتر تھا، نہیں گئے توپھر فارغ کردیا گیا۔
نجم سیٹھی نے کہا کہ میں سابق وزیر اعظم عمران خان کی حکومت آنے پر خود مستعفی ہو گیا تھا۔
