اسلام آباد ( نئی تازہ رپورٹ) چین کے آئی سی بی سی بینک نے ایک ارب 30 کروڑ ڈالر کے رول اوور کی منظوری دے دی، پاکستان کو 50 کروڑ ڈالر موصول ہوگئے۔
وفاقی وزیر خزانہ اسحاق ڈار نے ایک بیان میں کہا کہ یہ قرض حالیہ مہینوں میں پاکستان نے چین کو ادا کر دیا تھا۔ وزیر خزانہ اسحاق ڈار کے مطابق معمول کی کارروائیاں مکمل ہونے کے بعد انڈسٹریل انڈ کمرشل بینک آف چائنہ ( آئی سی بی سی) نے ایک ارب 30 کروڑ ڈالر رول اوور کی منظوری دے دی ہے، رقم تین اقساط میں ملے گی۔ اس سہولت کے تحت پاکستان کو 50 کروڑ ڈالر موصول ہوچکے ہیں جو اسٹیٹ بینک کے اکائونٹ میں آگئے ہیں، باقی 80 کروڑ ڈالر بھی دو قسطوں میں جلد موصول ہوں گے۔وزیر خزانہ کے مطابق اس رقم سے پاکستان کے زرمبادلہ ذخائر میں اضافہ ہوگا۔
گزشتہ روز وزیر خزانہ سینیٹر اسحاق ڈار نے پریس کانفرنس میں چیئرمین پاکستان تحریک انصاف کو تنقید کا نشانہ بناتے ہوئے کہا کہ عمران خان نے کوئی کسر نہیں چھوڑی تھی کہ ملک ڈيفالٹ کر جائے لیکن پاکستان ڈیفالٹ نہيں کرے گا۔
وزیر خزانہ اسحاق ڈار کے مطابق ہمارے پاس پالیسی بھی ہے، پلان بھی ہے اور روڈ میپ بھی ہے، تمہارے پاس کیا تھا، کوئی انڈیکیٹر تو دکھا دیں کہ آپ نے بہت اچھا کام کیا ہو، انہوں نے چیلنج کیا کہ عمران خان اپنے افلاطون لے آئیں اور ہم سے مقابلہ کر لیں۔
