اسلام آباد(نئی تازہ رپورٹ) انسداد دہشتگردی کی عدالت نے عدم پیشی پر چیئرمین پی ٹی آئی عمران خان کی عبوری ضمانت منسوخ کردی۔
بدھ کو اسلام آباد میں انسداددہشت گردی عدالت کے جج راجہ جوادعباس نے ہنگامہ آرائی کے کیس پر سماعت کی۔عدالت نے عمران خان کو آج ہی پیش ہونے کا حکم دیتے ہوئے وکیل کی مشاورت کے لیے ڈھائی بجے تک وقفہ کردیا تھا۔
سماعت کے دوران وکیل بابر اعوان نے کہا کہ عمران خان کبھی عدالتوں سے نہیں بھاگے، انہوں نے آنےکی کوشش کی مگر پھر تکلیف ہوگئی، وہ سفر نہیں کرسکے، عدالت کو ضمانت کافیصلہ بھی کرنا ہو تو عمران خان کی موجودگی ضروری ہے۔بابر اعوان نے عدالت سے 27 فروری تک التواء کی استدعاکی اور کہا کہ ایڈیشنل سیشن جج نے 27 فروری تک عبوری ضمانت دے رکھی ہے، استدعا ہے آپ بھی 27 فروری تک عبوری ضمانت میں توسیع دے دیں۔
عدالت نے ریمارکس دیئے کہ ہر پولیس مقابلے میں کسی نہ کسی کوگولی لگی ہوتی ہے، کیاکل ان ملزمان کو بھی ہمیں 6,6 ماہ کا استثنیٰ دینا ہوگا؟ میں تو کسی مقتدر شخص کو بھی وہی ریلیف دوں گا جو عام آدمی کو دے سکوں، ہم اس درخواست کا فیصلہ کردیتے ہیں آپ 27 فروری کو دوبارہ آجائیں۔
بابر اعوان نے کہا کہ درخواست خارج کرنے کے بجائے واپس کردیں، عدالت درخواست واپس کرکے کہہ دے کہ یہ دہشت گردی کا کیس نہیں۔عمران خان کے وکیل کی بات پر فاضل جج نے ریمارکس دیئے کہ اس حوالے سے ہائی کورٹ کا فیصلہ موجود ہے، چالان جمع ہونے سے پہلےدہشت گردی کی دفعات پر فیصلہ نہیں کرسکتے۔ عدالت نے مقررہ وقت تک عمران خان کے پیش نہ ہونے پرعبوری ضمانت منسوخ کردی۔
یاد رہے کہ گزشتہ سماعت کے موقع پر عدالت نے عمران خان کی طبی بنیادوں پر دائر حاضری سے استثنیٰ کی درخواست مسترد کرتے ہوئے آج حاضری یقینی بنانے کا حکم دیا تھا۔
