پاکستان میں ایلون مسک کی اسٹارلنک انٹرنیٹ سروس کےآپریشنز کے حوالے سے اہم پیشرفت سامنے آئی ہے۔
وزیرِاعظم کی ہدایت پر پاکستان اسپیس ایکٹیویٹی ریگولیٹری بورڈ نے اسٹارلنک کو این او سی جاری کرنے کی منظوری دے دی ہے، جس سے پاکستان ٹیلی کمیونیکیشن اتھارٹی (پی ٹی اے) کی جانب سے لائسنس کے اجرا کی راہ ہموار ہوگئی ہے۔
ذرائع کے مطابق پی ٹی اے اسپیس ایکس اور ٹیسلا کے بانی اور امریکی صدر کے مشیر ایلون مسک کی کمپنی اسٹارلنک کو لائسنس جاری کرنے میں زیادہ سے زیادہ چار ہفتے لے سکتی ہے، کمپنی کو رجسٹریشن سرٹیفکیٹ بھی جاری کیا جائے گا۔
واضح رہے کہ اسٹارلنک کو لائسنس ملنے کے بعد پاکستان میں مکمل آپریشنز شروع کرنے کے لیے کم از کم ایک سال درکار ہوگا، جبکہ سیٹلائٹ سروس پرووائیڈر کے لیے اسپیس ایکٹیویٹی ریگولیٹری بورڈ کی منظوری حاصل کرنا لازمی تھا۔
