کراچی( نئی تازہ ڈیسک) وزیراعظم شہباز شریف کی ہدایت پر جنگ زدہ لبنان کے عوام کے لیے انسانی امداد کی تیسری کھیپ روانہ کر دی گئی۔
نیشنل ڈیزاسٹر مینجمنٹ اتھارٹی (این ڈی ایم اے) جنگ زدہ غزہ اور لبنان کے عوام کو انسانی امداد فراہم کرنے کا سلسلہ جاری رکھے ہوئے ہے۔
این ڈی ایم اے اور الخدمت فاؤنڈیشن کے اشتراک سے اتوارکو بھیجی گئی اس امداد میں تقریباً 17 ٹن سامان شامل ہے، جس میں خیمے، کھانے کے ڈبے، خشک دودھ، کپڑے اور صفائی کی اشیاء شامل ہیں۔ یہ امدادی سامان کراچی کے جناح انٹرنیشنل ایئرپورٹ سے بیروت روانہ کیا گیا۔
جناح انٹرنیشنل ایئرپورٹ پر منعقدہ روانگی کی تقریب میں وفاقی وزیر برائے میری ٹائم افیئرز، قیصر شاہ، این ڈی ایم اے، وزارت خارجہ اور الخدمت فاؤنڈیشن کے نمائندے شریک ہوئے۔
تقریب سے خطاب کرتے ہوئے وفاقی وزیر نے فلسطین اور لبنان کے جنگ زدہ عوام کی مدد کی فوری ضرورت پر زور دیا۔ انہوں نے پاکستانی حکومت کی جانب سے متاثرہ بھائیوں اور بہنوں کے ساتھ یکجہتی کا اعادہ کیا اور کہا کہ فلاحی ادارے اور عوام مشترکہ کوششوں سے اس مقصد کو کامیاب بنا سکتے ہیں۔
یہ بھی پڑھیں : بینظیرانکم سپورٹ پروگرام کی رقم 13 ہزار پانچ سوروپے کر دی جائے گی، روبینہ خالد
یاد رہے کہ اس سے قبل حکومت پاکستان 11 امدادی کھیپیں غزہ، فلسطین بھیج چکی ہے،جبکہ یہ لبنان کے لیے تیسری کھیپ تھی جس کا مجموعی وزن 1398 ٹن ہے۔ حکومت پاکستان جنگ زدہ لبنان اور فلسطین کے عوام کی ضرورت کے مطابق امدادی سامان بھیجنے کا سلسلہ جاری رکھے ہوئے ہے۔
وزیراعظم کی ہدایت پر “وزیراعظم ریلیف فنڈ برائے غزہ اور لبنان” کے نام سے ایک خصوصی اکاؤنٹ بھی قائم کیا گیا ہے، تاکہ عوام اپنے جنگ زدہ بھائیوں اور بہنوں کی امداد میں حصہ ڈال سکیں۔
